ԵՐԵՎԱՆ, 18 հուլիսի./Նովոստի–Արմենիա/. Բոլորը գիտեն, որ ճամփորդությունից առաջ ճամպրուկը և ուղեբեռը պետք է նախօրոք հավաքել, ցանկալի է ճամփորդությունից մի քանի օր առաջ։ Սակայն խոստովանեք, որ քչերին է հաջողվում հետևել այս խորհրդին, այդ պատճառով իրերը հավաքելու պրոցեսը միշտ հետաձգվում է մինչև վերջին րոպեն, երբ չվերթին մնում են հաշված ժամեր։
Շտապողականության մեջ ոչինչ չմոռանալու և վստահ զգալու համար առաջարկում ենք ձեզ մի շարք խորհուրդներ, որոնք հիմնված են Skyscanner–ի նյութի վրա։
Գումար և փաստաթղթեր
Առաջին հերթին հավաքեք անհրաժեշտ փաստաթղթերը։ Ձեռքի ուղեբեռում դրեք անձնագիրը, եթե ճամփորդում եք երեխայի հետ, ապա վերցրեք նրա համար անհրաժեշտ բոլոր փաստաթղթերն` անձնագիրը, ծննդյան վկայանը և այլն։
Ճամփորդելիս կարևոր է ունենալ ինչպես բանկային քարտ, այնպես էլ կանխիկ գումար։ Ընդ որում կանխիկ գումարն ավելի լավ է վերցնել դոլարով կամ եվրոյով, որպեսզի դրանք հնարավոր լինի հեշտությամբ փոխարկել տեղական արժույթով։
Ճամփորդելիս մի մոռացեք նաև ինքնաթիռի, գնացքի, ավտոբուսի տոմսերը, հյուրանոցի ամրագրման կտրոնները, վարորդական իրավունքը, անձնագրերի պատճեներն ու ճանապարհորդի ապահովագրական պոլիսը։
Տեխնիկա
Ուղեբեռի և ձեռքի ուղեբեռի քաշը նվազեցնելու համար վերցրեք միայն սմարթֆոն` նախօրոք վերածելով այն ունիվերսալ օգնականի։ Տեղադրեք օֆլայն քարտեզներով ծրագրեր, թարգմանչական, ընթերցանության ծրագրեր ու բլոկնոտ։ Եթե սմարթֆոնի լիցքավորումն արագ վերջանում է, վերցրեք արտաքին մարտկոց և պարտադիր ձեռքի ուղեբեռում դրեք լիցքավորման լարը, որպեսզի ուղեբեռի կորստի կամ ուշանալու դեպքում ձեզ անհրաժեշտ իրերը ձեզ հետ լինեն։
Կենցաղային մանր իրեր ու հարմարավետություն գնացքում
Կարևոր է վերցնել փոքր պայուսակ կամ ուսապարկ` քաղաքում կամ լողափում զբոսնելիս անհրաժեշտ իրերը պահելու համար։
Կարող է հարկավոր լինել նաև անձրևանոց կամ անջրանցիկ բաճկոն, գրպանի հայելի, տոպրակներ, արևային ակնոցներ, շվեյցարական բանակային դանակ, քնի դիմակ, փչովի բարձիկ, մնացածը կարելի է ձեռք բերել տեղում։
Հիգիենիկ միջոցներ և կոսմետիկա
Անպայման վերցրեք ածելի, դեզոդորանտ, ատամի մածուկ, խոզանակ և սանր։ Ձեռքի ուղեբեռում կարելի է վերցնել նաև խոնավ անձեռոցիկ և ախտահանող գել ձեռքերի համար։
Մնացած բոլոր առարկաները կարելի է գնել տեղում։ Եթե ցանկանում եք ինչ–որ բան վերցնել, հիշեք իրերի տեղափոխության կանոնների մասին և ստուգեք ուղեբեռում ու ձեռքի ուղեբեռում արգելված իրերի ցանկը։
Հագուստ և կոշկեղեն
Անցնենք ամենաբարդին` հագուստին և կոշկեղենին։ Առաջարկում ենք ցանկ` կազմված այն իրերից, որոնք հաստատ պետք կգան ճամփորդելիս` բլուզ կամ շապիկ, տաբատ, ջինսեր, կանացի կարճ զգեստ, հուդի, սվիտեր կամ տաք շապիկ, ներքնազգեստ, գուլպա կամ զուգագուլպա, հարմար և ամենօրյա կոշիկներ, կարճաթև և երկարաթև վերնաշապիկ։
Մնացած հագուստը և կոշկեղենը կարող եք ընտրել` ըստ եղանակի և սեփական ցանկության։ Կարևոր է չափը չանցնել ու չվերցնել ավելորդ իրեր։
Իրեր երեխաների համար
Եթե ճամփորդում եք երեխաների հետ, վերցրեք ճանապարհին անհրաժեշտ իրեր։
Հագուստից երեխային անհրաժեշտ կլինի տաբատ կամ ջինսեր, վերնաշապիկ, սվիտեր, թեթև բաճկոն կամ տաք վերնաշապիկ, ներքնազգեստ, գուլպաներ, զուգագուլպաներ, պանամա, կեպկա, արևապաշտպան գլխարկ, տաք կոշիկներ, հարմար, թեթև կոշիկներ, կարճաթև և երկարաթև վերնաշապիկ, շորտեր, կիսաշրջազգեստ, զգեստ կամ սարաֆան։
Ձեռքի ուղեբեռում դրեք լրացուցիչ հագուստ, եթե երեխան ճանապարհին կեղտոտի շորերը, և սնունդ, օրինակ` խնձոր, թխվածքաբլիթ, մի շիշ ջուր և մանկական սնունդ փոքրիկների համար։
Ձեզ անհրաժեշտ կլինեն նաև տակդիրներ, ճամփորդական դեղարկղիկ, խոնավ անձեռոցիկներ, մանկական օճառ, շամպուն, ատամի խոզանակ և մածուկ, քսուք։–0–
