ԵՐԵՎԱՆ, 18 հուլիսի. /Նովոստի–Արմենիա/. Շոկոլադի չորրորդ ամենամյա փառատոնը կայացավ հուլիսի 11–ին` Շոկոլադի միջազգային օրվա առթիվ Երևանում` նույն հարթակում մեկտեղելով այդ քաղցրավենիքի սիրահարներին և արտադրողներին։
Այս տարի, կազմակերպիչ Ալեքս Միրզոյանի խոսքով, փառատոնն անցկացվել է նոր ձևաչափով։
«Այս անգամ մենք փոխել ենք ձևաչափը` որոշելով ավելի ստեղծագործական միջոցառում ներկայացնել` համարելով, որ պարզապես էքսպոն այդքան էլ հետաքրքիր չէ»,– ասաց Միրզոյանը։
Այս տարի փառատոնն ավելի ինտերակտիվ դարձավ` թույլ տալով հյուրերին մասնակից դառնալ։ Միջոցառման առանցքային բաղադրիչներից մեկը դարձավ պրոֆեսիոնալ հրուշակագործի կողմից շոկոլադի պատրաստման վարպետության դասը։ Նաև ցուցադրվեց «Շոկոլադ» ֆիլմը։
Փառատոնի անցկացման հիմնական նպատակը հայ շոկոլատիեներին խրախուսելն է։
«Մենք հրավիրել ենք մարդկանց, ովքեր շոկոլադ են ստեղծում Հայաստանում։ Միջազգային ապրանքանիշերին ծանոթ ենք, իսկ Հայաստանում շոկոլադ ստեղծողների մասին այդքան էլ հաճախ չեն խոսում, նրանց արտադրանքն ամենուր չի վաճառվում։ Այդ իսկ պատճառով մենք որոշել ենք տարին գոնե մեկ անգամ օգնել նրանց իրենց արտադրանքի իրացման գործում»,– ասաց Միրզոյանը։
Փառատոնին կարելի էր համտեսել hand-made շոկոլադ, շոկոլադե քաղցրաբլիթներ և խմորեղեն, օրիգինալ սալիկներ` համերի հետաքրքիր համադրությամբ։
Շոկոլադե տոնին մասնակցեց շոկոլադ արտադրող 5 ընկերություն։
Կազմակերպիչը պատմեց, որ նախորդ տարիներին փառատոնին մասնակցած որոշ շոկոլատիեներ հետագայում բացեցին իրենց բուտիկները` ընդլայնելով բիզնեսը և ավելի ճանաչելի դառնալով։
Նա նաև ասաց, որ հետագայում ծրագրվում է փառատոնը վերածել շոկոլադի իսկական տոնի` այն կազմակերպելով մեծ հարթակում։
«Հույս ունեմ, որ հինգերորդ փառատոնը կմիավորի շոկոլադ արտադրող և ներկրող բոլոր կազմակերպություններին, և մեզ կհաջողվի դա ավելի մասշտաբային դարձնել»,– ասաց Միրզոյանը։
Նա նշեց, որ ձևաչափը նույնպես մի փոքր փոխվել է, որ միջոցառումն ավելի տոնական դառնա։ -0-
