ԵՐԵՎԱՆ, 31 հուլիսի./Նովոստի–Արմենիա/. Menu Group հայկական արմատներով միջազգային ընկերությունը, որին պատկանում են Menu.am,Menu.ge և Menu.by առաքման ծառայությունները Հայաստանում, Վրաստանում և Բելառուսում համապատասխանաբար, հայտարարել է ուկրաինական առաջատար ընկերության՝ Eda.ua-ի ձեռք բերման մասին, «Նովոստի–Արմենիա» գործակալությանը տեղեկացրեցին Menu Group–ի մամուլի ծառայությունից։
Ինչպես նշվում է հաղորդագրության մեջ, 2017թ.-ին ընկերությունը ներգրավել է 3մլն ԱՄՆ դոլար ռուսական առաջատար առաքման ծառայության հիմնադրի և մի քանի այլ վենչուրային ֆոնդերից, որոնք ուղղվել են ընկերության զարգացման և նոր պրոդուկտի (կայք և բջջային հավելվածներ) մշակման վրա։
Մոտակա 2 տարիների ընթացքում, ընկերությունը պատրաստվում է ավելի քան 10մլն ԱՄՆ դոլար ներդնել Ղազախստանում, Մոլդովայում, Ուզբեկստանում և Ղրղզստանում առաքման ծառայություն հիմնելու համար։–0–
