ԵՐԵՎԱՆ, 9 սեպտեմբերի./Նովոստի–Արմենիա/. Հայերն ավելի շատ օղի են խմում, քան գինի, և դա պայմանավորված է ժողովրդի պատմությամբ, լրագրողներին ասաց Հայաստանի գինեգործների միության նախագահ Ավագ Հարությունյանը։
«Օղի խմելը վատ չէ։ Հազարավոր տարիներ օղին արգելված էր և համարվում էր հարուստների ըմպելիք։ Այն դարձել է վերջին 200 տարիների ֆենոմենը», – նշեց նա։
Հարությանյանի խոսքով, ռուս–թուրքական պատերազմի և Հայաստանում ռուսական զորախմբի ընդլայնման տարիներին օղին դարձել էր գրեթե արժույթ, և Հայաստանում այդ կերպ հանվեց որոշակի հոգեբանական և սոցիալական արգելքը, իսկ Ռուսաստանում` իրավաբանական։
«Համի տեսանկյունից մենք ավելի շատ նման ենք ռուսներին։ Մի մոռացեք, որ այստեղ միշտ եղել է ռուսական զորք, իսկ 1945–1946թթ.–ին 600 հազար հայ տղամարդիկ, ովքեր կազմում էին տեղացի տղամարդկանց կեսը, վերադարձան պատերազմից և իրենց հետ բերեցին սպիրտ խմելու մշակույթ», – նշեց Հարությունյանը։
Նրա խոսքով, հայերը դրանից առաջ էլ էին օղի խմում, սակայն անցյալում օղուն վերաբերվում էին մեծ հարգանքով և համարում էին առանձնահատուկ ըմպելիք։
«Մենք ֆենոմենալ ժողովուրդ ենք։ Օղի ենք խմել դեռևս մինչև ուրարտական ժամանակաշրջանը, այդ ընթացքում և դրանից հետո», – ընդգծեց Հարությունյանը։
Հայերը, նրա խոսքով, ունեին 80 աստիճանից բարձր թնդության օղու պատրաստման տեխնոլոգիաներ։ Եվրոպայում այդ տեխնոլոգիան հայտնվելէ 1880–ականներին, իսկ Հայաստանում այն եղել է արդեն 16–րդ դարում։
«Մենք օղի խմող ազգ ենք եղել, սակայն հարգել ենք այդ ըմպելիքը, մենք այն ֆետիշացրել ենք և չենք խմել մինչև հարբելը։ Օղին պահում էին ամենասրբազան դեպքերի համար։ Իսկ սովորաբար խմում էինք գինի», – նշեց Հարությունյանը։
Նրա խոսքով, ով խմել է օղի, նա շարունակում է դա անել նաև այսօր, չնայած գինու տարածվածությանը։
«Միգուցե նրանք չեն ցանկանում միանգամից անցնել գինու և ընտրել են անցումային տարբերակը` մրգային օղին։ Սակայն դա ամեն դեպքում անցում է, նրանք ևս կսկսեն գինի խմել», – եզրափակեց Հարությունյանը։–0–
