ԵՐԵՎԱՆ, 19 սեպտեմբերի./Նովոստի–Արմենիա/. Հայաստանի մայրաքաղաքում նախօրեին մեկնարկեց Yerevan Food Fest–ը, որն արդեն երրորդ տարին է` ինչ անցկացվում է նոր ձևաչափով` շեշտադրելով մասնագիտացված դասընթացները և վարպետաց դասերը։ Այս տարվա փառատոնի թեման կլինի բարը։
Փառատոնի հիմնադիր և տնօրեն Աննա Մազմանյանը պատմեց, որ միջոցառման գլոբալ նպատակը Երևանը գաստրոնոմիկ մյուս քաղաքների շարքում դնելն է, այն աշխարհում ճանաչելի կենտրոն դարձնելը։
«Yerevan Food Fest–ը մեր կողմից ադապտացված մի քանի ձևաչափերի և փառատոների միքս է։ Ամեն տարի այն ձևափոխվում է, որովհետև խիստ կանոններ չկան` այն մշտապես աճում, վերափոխվում է` կախված հենց այս շուկայի պահանջարկից և կարիքներից»,– ասում է Մազմանյանը։
Նա կարծում է, որ գաստրոնոմիկ ոլորտի ճիշտ աճը կհանգեցնի տնտեսական բազմաթիվ ուղղությունների, մասնավորապես, գյուղատնտեսության զարգացմանը։
«Գյուղատնտեսությունը սկսում է զարգանալ, պրոդուկտները ճանաչելի են դառնում։ Դա հանգեցնում է նրան, որ մենք նոր աշխատատեղեր ենք ստեղծում գյուղատնտեսության և զբոսաշրջության ոլորտում»,– ասաց Մազմանյանը։
Այս տարի, կազմակերպչի խոսքով, փառատոնը բազմաթիվ հետաքրքիր հյուրեր ունի Լիբանանից, Դանիայից, Իսպանիայից, Իտալիայից, Ռուսաստանից, Գերմանիայից, որոնց թվում տարբեր բնագավառների փորձագետներ կան։ Խոհարարները, PR մենեջերները, լրագրողները տարբեր թեմաներով դասընթացներ և վարպետության դասեր կանցկացնեն։ Օրինակ, խոհարարները 4 ձեռքի ընթրիք կպատրաստեն, լրագրողները դասախոսություն կկարդան այն մասին, թե ինչպես ֆուդ քննադատական գրել և այլն։ Մազմանյանը նշեց, որ առաջին անգամ հաջողվեց Հայաստան հրավիրել խոհարարական համաշխարհային առաջատար Le Cordon Bleu դպրոցը, որի ներկայացուցիչները երեք վարպետության դաս կանցկացնեն փառատոնի շրջանակում։
Փառատոնը նոր մարտահրավերներ կնետի խոհարարներին։ Եթե նախորդ տարի խոհարարները ճաշացանկ էին հնարում` հիմնվելով հենց Հայաստանի տարածաշրջանի արտադրանքի վրա, ապա այս տարի նրանք կպատրաստեն աշխարհի տարբեր խոհանոցների կերակրատեսակներ բացառապես հայկական մթերքից։
«Բոլոր բաղադրիչները կփոխարինվեն հայկական մթերքներով, հասկանալու համար, թե ինչպես կարելի է համադրել հայկական մթերքը և, ենթադրենք, իսպանական ավանդույթները։ Օրինակ, պերուական խոհանոցը կօգտագործի հայկական ձուկը»,– ասաց նա։
Մազմանյանը պատմեց, որ հայկական խոհանոցի ապրանքանիշի ստեղծման հարցում նա շեշտը դնում է մարզերի և շեֆ խոհարարների վրա։ Նրա խոսքով, յուրաքանչյուր կերակրատեսակ կարող է պատրաստված լինել ցանկացած երկրում, և կարելի է երկար վիճել, թե ում է պատկանում այս կամ այն բաղադրատոմսը, բայց դա, ըստ նրա, անիմաստ է։
«Հակառակը, պետք է ասել. «Այո, դուք էլ ունեք, բայց մեր միսն ավելի լավն է, և մեր շեֆն ավելի լավ է պատրաստում»։ Եվ դա ավելի մրցունակ է, քան պարզապես խոսել բաղադրատոմսի ծագման մասին»,– կարծում է նա։
Հասկանալու համար, թե որ ուղղությամբ է ավելի լավ աշխատել հայկական խոհանոցը մասսայականացնելու համար, կատարվում է աշխարհի ապրանքանիշերի իրավիճակի ամենամյա վերլուծություն։ Նախորդ տարի, ինչպես պատմեց Մազմանյանը, աշխատանքն ԱՊՀ–ի ուղղվածություն ուներ, այս տարի` Եվրոպայի և Մերձավոր Արևելքի, իսկ հաջորդ տարի` Ասիայի։
Ինչ վերաբերում է աշխարհում հայկական խոհանոցի կարգավիճակին` Մազմանյանն անկեղծ պատասխանեց, որ այն «լղոզված է»։ Նրա խոսքով, մարդիկ գիտեն հայկական խոհանոցի մասին միայն տարածաշրջանային համատեքստում` չնույնականացնելով այն որպես առանձին միավոր։
«Հայկական խոհանոցի մասին պատկերացումը լղոզված է։ Եվ որպեսզի մարդիկ հասկանան, թե ինչ է հայկական խոհանոցը, մենք ինքներս դա պետք է հասկանանք։ Պետք է նստել, հավաքել ամբողջ տեղեկությունը, մի դասագիրք գրել և հասկանալ, թե ինչ է հայկական խոհանոցը։ Իսկ մինչ այդ մենք այդպես էլ շարունակելու ենք ապրել լղոզված վարկանիշով»,– նշեց Մազմանյանը։ -0-
