ԵՐԵՎԱՆ, 23 սեպտեմբերի./Նովոստի–Արմենիա/. Միջազգային էթնոգաստրոնոմիկ կենտրոնի նախագահ, Ռուսաստանի ռեստորատորների և հյուրանոցատերերի ֆեդերացիայի փոխնախագահ Լեոնիդ Գելիբտերմանը «Նովոստի–Արմենիա» գործակալությանը պատմել է Հայաստանում դեկտեմբերի 2–6–ը նախատեսվող «Ռուսական գաստրոնոմիկ շաբաթվա» մասին։
Հայաստանն ընտրվել է միջոցառման անցկացման համար ԱՊՀ երկրների շրջանում, և ինչպես նշեց Գելիբտերմանը, ընտրությունը բավականին տրամաբանական է մի շարք պատճառներով, որոնց թվում են հուսալի գործընկերներն ու լեզվական խոչընդոտի բացակայությունը։
«Նաև կարևոր է այդ երկիրը զգալը։ Ինձ թվում է` ես զգում եմ, այդ պատճառով ընտրությունն ինձ համար բավականին տրամաբանական էր։ Բացի այդ, գրեթե չկա լեզվական խոչընդոտ, երկիրը ԵՏՄ անդամ է, չեն լինի բարդություններ` կապված վիզա ստանալու, սահմանն անցնելու հետ», – նշեց նա։
Գելիբտերմանի խոսքով, ռուսական գաստրոնոմիկ շաբաթը միջոցառումների մի ամբողջ համալիրէ ։ Նա նշեց, որ ամեն տարի բերում է ռուս շեֆ խոհարարների թիմ երկրի տարբեր շրջաններից։ Հայաստան պետք է ժամանեն խոհարարներ Արխանգելսկի և Պսկովի մարզերից, ինչպես նաև Նենեցի ինքնավար օկրուգից։
«Շեֆ խոհարարները պատրաստելու են այդ շրջաններին բնորոշ ճաշատեսակներ։ Լինելու է շատ յուրահատուկ և անսովոր մթնոլորտ», – ասաց Գելիբտերմանը։
«Շաբաթվա» ծրագրում ներառված է «Ռուսաստան–Հայաստան» հատուկ խոհարարական գագաթնաժողով, որի մանրամասները դեռ չեն հաղորդվում, սակայն Գելիբտերմանը վստահեցրեց, որ հետաքրքիր է լինելու։ Կկազմակերպվի նաև Ռուսաստանի և Հայաստանի տուրիստական հնարավորություններին նվիրված սեմինար, ինչպես նաև ռեստորատորների հանդիպում։
Միջազգային էթնոգաստրոնոմիկ կենտրոնի նախագահի խոսքով, Հայաստան կայցելի Ռուսաստանի ռեստորատորների և հյուրանոցատերերի ֆեդերացիայի ղեկավարությունը` տեղացի ռեստորատորների հետ հանդիպելու և ընդհանուր խնդիրները քննարկելու համար։
«Կկազմակերպվի նաև շատ հետաքրքիր վարպետության–դաս «Կրեմլյան խոհանոցի գաղտնիքները» խորագրով։ Ես Հայաստան կբերեմ մի մարդու, ով 30 տարի Կրեմլում խոհարար է աշխատել, ճաշատեսակներ է պատրաստել Բրեժնևի, Պուտինի համար։ Նա կխոսի կրեմլյան խոհանոցի գաղտնիքների մասին։ Ով ինչ է սիրում, ով ինչ չի սիրում...», – նշեց նա։
Միջոցառումը կբացվի ՀՀ–ում ՌԴ դեսպանատանը կազմակերպվող առանձնահատուկ ֆուրշետով, իսկ կավարտվի ռուս շեֆ խոհարարների կողմից կազմակերպվող գալա–ընթրիքով, որտեղ յուրաքանչյուր խոհարար կպատրաստի մեկական ճաշատեսակ։ Ռուսական գաստրոնոմիկ շաբաթվա շրջանակում ամեն օր կկազմակերպվեն ընթրիքներ։
Միջոցառումը բաց է բոլոր ցանկացողների համար։ Դրա հիմնական նպատակն է ներկայացնել ռուսական շրջանները, դրանց բազմազանությունը, տեղական խոհանոցը, շեֆ խոհարարներին, ինչպես նաև արտադրողներին։ Գելիբտերմանն օրինակ նշեց, որ Ռուսաստանում կա հիանալի ձկնամթերք, հատապտուղներ, որոնք չկան Հայաստանում, ոչ ալկոհոլային խմիչքներ, թեյեր, համեմունքներ և այլն։
«Շուկան իրականում շատ մեծ է, և մենք ցանկանում ենք այն այստեղ ցուցադրել, քանի որ վստահ ենք, որ այստեղ կա սպառող», – ասաց նա։–0–
