ԵՐԵՎԱՆ, 1 հոկտեմբերի. /Նովոստի-Արմենիա/. Փառատոնն անցկացվում է արդեն երեք տարի։ Ի տարբերություն նախորդ տարիների՝ այս տարի փառատոնը երկօրյա էր (սեպտեմբերի 28-29), արհեստագործներն էլ հինգ մարզից էին՝ Շիրակ, Լոռի, Տավուշ, Վայոց ձոր և Սյունիք։ Ընդհանուր շուրջ 40 արհեստագործ ցուցադրեցին իրենց աշխատանքները, որոնց մի մասը ստեղծվել, մյուս մասը կատարելագործվել էր փառատոնի գործընկեր «Տերյան» մշակութային կենտրոնի հետ համագործակցության արդյունքում։
ԱՄՆ Միջազգային զարգացման գործակալության հայաստանյան առաքելության տնօրեն Դեբորա Գրիզերն ասել է. «Մենք աջակցում ենք մարզերում բնակվող արհեստագործներին զարգացնելու իրենց գործունեությունը դիտարկելով այն որպես այլընտրանքային եկամտի հիմնական աղբյուր։ Ավելին, մեր այս նախաձեռնությամբ մենք ուզում ենք միահյուսել արհեստագործությունն ու զբոսաշրջությունը՝ հնարավորություն ընձեռելով մեր շահառուներին ունենալու առավել մեծ հանրայնացում և գործերի վաճառքի ավելի մեծ հնարավորություն։ վստահ եմ, որ այս նախաձեռնությունը մարզերի տնտեսական շարժմանը նոր թափ կարող է հաղորդել»:
«Այս տարի արդեն երրորդ անգամ ենք հանրության ուշադրությանը ներկայացնում մարզերից ժամանած տաղանդավոր վարպետների ձեռքի աշխատանքները։ «Իմ ձեռագործ Հայաստան» փառատոնը ցուցադրում է մարզային արհեստն ու տաղանդը երևանաբնակներին, որտեղ այցելուները կարող են ոչ միայն ծանոթանալ և գնել ձեռքի աշխատանքներ, այլև ինքնուրույն փորձել սովորել և պատրաստել տարատեսակ իրեր», - նշել է «Իմ Հայաստան» ծրագրի ղեկավար՝ Սիսակ Մխիթարյանը։
Արհեստագործները փառատոնի այցելուների համար փոքրիկ դասընթաց էին կազմակերպում և հնարավորություն էին տալիս սովորածը տեղում կիրառելու՝ պատրաստելով փայտի փորագրման, ասեղնագործության, կավագործության, գորգագործության աշխատանքի նմուշներ։
«Իմ Հայաստան» ծրագիրը՝մարզերում զբոսաշրջությունը խթանելու և կենսամակարդակի բարելավման նպատակով, նոր աշխատատեղեր ստեղծելու ճանապարհով, օգնում է ամրապնդել և կայուն հիմքերի վրա դնել գյուղի զարգացումն ու ապահովում մշակութային ժառանգության պահպանումը: Ներկայումս ծրագիրն աշխատում է Սյունիքի, Վայոց ձորի, Լոռու, Տավուշի և Շիրակի մարզերում՝ հասանելի դարձնելով և տարածելով Հայաստանի մշակութային ժառանգության մասին տեղեկատվությունը, ինչպես նաև օգնելով տեղի արհեստագործներին, զբոսավարներին, թանգարաններին, հնավայրերին՝ բրենդավորման, մարքեթինգի, գնագոյացման և այլ հարցերի շուրջ մասնագիտական դասընթացներով, ինչը մարզաբնակներին հնարավորություն կտա ավելի մեծ եկամուտ ստանալ զբոսաշրջության ոլորտից, իսկ միջազգային շուկաներում Հայաստանը կդարձնի առավել տեսանելի:
«Իմ ձեռագործ Հայաստան» փառատոնին աջակցել է Գաֆէսճեան արվեստի կենտրոնը՝ տրամադրելով իր Գաֆէսճեան քանդակների պարտեզի տարածքը։-0-
