ԵՐԵՎԱՆ, 5 նոյեմբերի./Նովոստի–Արմենիա/. Դեկտեմբերի 2–6–ը Հայաստանում կանցկացվի Ռուսական գաստրոնոմիկ շաբաթ 2019–ը (ՌԳՇ–2019), որի կազմակերպիչն է Միջազգային էնոգաստրոնոմիկ կենտրոնը (ՄԷԿ), որը ՄԱԿ–ի Համաշխարհային տուրիստական կազմակերպության անդամ է։
Ռուսական գաստրոնոմիկ շաբաթը կմեկնարկի դեկտեմբերի 2–ին` Երևանում ՌԴ դեսպանատանը նախատեսված հանդիսավոր ընդունելությամբ, որին կմասնակցեն ռուս և հայ դիվանագետներ, պաշտոնատար անձինք, գործարարներ, գիտության և մշակույթի գործիչներ, լրատվամիջոցների ներկայացուցիչներ։
Շաբաթվա բացման պաշտոնական արարողության գաստրոնոմիկ մասը կապահովի շեֆ խոհարարների ռուսական թիմը, ովքեր կժամանեն Երևան` հեղինակային ճաշատեսակները ներկայացնելու համար։
Ռուսական գաստրոնոմիկ շաբաթվա շրջանակում Հայաստանում կկազմակերպվեն մի շարք միջոցառումներ, որոնցից առանցքայիններն են գաստրոնոմիկ երթուղիների, տուրիզմի, ռուսական շրջանների սննդամթերքի և ըմպելիքների արտադրողների ցուցահանդեսները, տարածաշրջանային թեմատիկ ընթրիքներն` Արխանգելսկի մարզից, Մոսկվայից, Նենեցի ինքնավար օկրուգից և Պսկովի մարզից ժամանած շեֆ խոհարարների մատուցմամբ։ Ճաշատեսակների հետ մատուցվելու է հայկական գինի և ալկոհոլային խմիչք։
Գաստրո շաբաթվա շրջանակում կկազմակերպվեն նաև «Ռուսաստան–Հայաստան» խոհանոցային գագաթնաժողովը, Ռուսաստանի խոհարարների ազգային ասոցիացիայի նախագահ Վիկտոր Բելյաևի «Կրեմլյան խոհանոցի գաղտնիքները» խորագրով վարպետության դասը, կլոր սեղան` հայ ռեստորատորների և հյուրանոցատերերի մասնակցությամբ, որին կմասնակցի նաև Ռուսաստանի ռեստորատորների և հյուրանոցատերերի ֆեդերացիայի նախագահ Իգոր Բուխարովը։ Կկազմակերպվի նաև տուրիստական հնարավորությունների սեմինար։
Ռուսական գաստրոնոմիկ շաբաթվա մասնակիցներն ու հյուրերը կստանան բացառիկ հնարավորություն համտեսել հեղինակային ճաշատեսակներ Ռուսաստանի տարբեր անկյուններից, Պսկովի շրջանի խոհանոցը, ժամանակակից մոսկովյան խոհանոցը, Պոմորիեի խոհանոցն ու ռուսական Հյուսիսի նենեցյան խոհանոցը։
Գաստրո շաբաթվա միջոցառման անցկացման հիմնական հարթակներն են «Grand Hotel Yerevan» 5 աստղանի հյուրանոցը, ինչպես նաև «Salon» և «Claude Monet» ռեստորանները։
Միջազգային մասշտաբային նախագիծն իրականացվում է Միջազգային էնոգաստրոնոմիկ կենտրոնի կողմից` ՌԴ ԱԳՆ–ի, Ռոսսոտրուդնիչեստվոյի և ՀՀ–ում ՌԴ դեսպանատան աջակցությամբ։ Ռուսական գաստրո շաբաթվա անցկացմանն աջակցում են նաև ՄԱԿ–ի համաշխարհային տուրիստական կազմակերպությունը, Ռուսաստանի խոհարարների ազգային ասոցիացիան, Ռուսաստանի ռեստորատորների և հյուրանոցատերերի ֆեդերացիան, ինչպես նաև ռուսական այլ առաջատար պրոֆեսիոնալ ասոցիացիաներն ու միավորումները։
Հայկական կողմից նախագծին աջակցում է ՀՀ էկոնոմիկայի նախարարության Տուրիզմի կոմիտեն, Mazmanyan Solutions–ն ու ոլորտում գործող հայկական պրոֆեսիոնալ կազմակերպություններն ու միավորումները։
Ռուսական գաստրո շաբաթը կանցկացվի արտերկրում արդեն 5–րդ անգամ։ Այսպես, 2015թ.–ին Ռուսական գաստրո շաբաթը հյուրընկալվել էր Մադրիդում (Իսպանիա), 2016թ.–ին` Մադրիդում և Բարսելոնայում (Իսպանիա), 2017թ.–ին` Նիկոսիայում և Լիմասոլում (Կիպրոս), 2018թ.–ին Գաստրո շաբաթն անցկացվել է «Ռուսաստան–Հունաստան» տուրիզմի խաչաձև տարվա շրջանակում` Աթենքում և Կորֆու կղզում։
Ռուսական գաստրո շաբաթը մշտապես արժանացել է ամենադրական արձագանքների ՄԱԿ–ի համաշխարհային տուրիստական կազմակերպության գլխավոր քարտուղարներից, ՌԴ դեսպաններից, մասնակից երկրների պաշտոնատար անձանցից, բիզնեսի ներկայացուցիչներից, պրոֆեսիոնալ կազմակերպությունների ղեկավարներից, փորձագետներից և լայն լսարանից։ Ռուսական գաստրո շաբաթ 2015–2018թթ.–ի իրադարձությունները լայնորեն լուսաբանվել են ռուսական և արտերկրյա լրատվամիջոցների կողմից։
«Ռուսական գաստրոնոմիկ շաբաթ» նախագծի հայեցակարգն ուղղված է մասնակից երկրների մշակութային և գործարար կապերի ամրապնդմանը, դրանց հանրայնացմանը` որպես գրավիչ տուրիստական ուղղություններ` ներկայացնելով այդ երկրների զբոսաշրջային ներուժը, ռուսական ազգային խոհանոցի ճաշատեսակները, մարզերում գործող սննդի կետերը։ Նախագծի նպատակն է ուշադրություն գրավել տարածաշրջանային ներդրումային նախագծերին, աջակցել մասնակից երկրների ապրանքաշրջանառության աճին, սննդամթերքի, խմիչքի և ծառայությունների արտահանմանն ու ներմուծմանը։–0–
