ԵՐԵՎԱՆ, 17 նոյեմբերի./Նովոստի–Արմենիա/. Նախօրեին Երևանում անցկացվեց առաջին ArmCocktail Festival–ը, որն իր շուրջը համախմբեց որակյալ ալկոհոլի և յուրօրինակ միքսերի սիրահարներին։
Երևանյան չորս հաստատություններ ներկայացրեցին իրենց լավագույն կոկտեյլներն ու պայքարեցին փառատոնի գլխավոր մրցանակի համար։ Ամենաշատ կոկտեյլները վաճառած տաղավարն արժանացավ 500 հազար դրամ մրցանակի։
Երեկոյին հատուկ մթնոլորտ հաղորդեցին տաղանդավոր երգիչների և երաժիշտների ելույթները։ Փառատոնի հյուրերի և մասնակիցների համար ելույթ ունեցան Սոնան և «Ձայնը» հայկական նախագծի հաղթող Ռաիսա Ավանեսյանը։
Փառատոնի կազմակերպիչ և տնօրեն Լիլիթ Գալստյանը «Նովոստի–Արմենիա» գործակալության թղթակցին նշեց, որ փառատոնի հիմնական նպատակն է Հայաստանում այս ուղղության զարգացումը։
«Որպես կազմակերպիչ` իմ գլխավոր նպատակն է, որպեսզի հայ բարմեններն ունենան առաջ գնալու և զարգանալու խթան», – ասաց նա։
Գալստյանը նաև նշեց, որ հաջորդ տարի փառատոնը կանցկացվի ամռանը ու կլինի ավելի մասշտաբային։–0–
