ԵՐԵՎԱՆ, 6 դեկտեմբերի./Նովոստի–Արմենիա/. Երևանում Ռուսական գաստրոնոմիկ շաբաթի շրջանակում անցկացվեց «Ռուսաստան–Հայաստան» առաջին խոհարարական գագաթնաժողովը, որը նշանավորվեց խոհարարական մրցույթի անցկացմամբ Մոսկվայից ժամանած շեֆ խոհարար Անտոն Սալնիկովի և հայաստանցի շեֆ խոհարար Կամո Գույումջյանի միջև։
«Ռուսական գաստրոնոմիկ շաբաթ» նախագծի կազմկոմիտեի ղեկավար
Լեոնիդ Գելիբտերմանը «Նովոստի–Արմենիա» գործակալության թղթակցի հետ զրույցում պատմեց, որ գագաթնաժողովի անցկացումը հետապնդում է երեք նպատակ։ Առաջինը, Գելիբտերմանի խոսքերով, նա ցանկանում էր, որ ռուս և հայ խոհարարները պատրաստեն միասին ոչ թե մենամարտի ձևաչափով, այլ ընկերական մթնոլորտում։
«Պատահական չէ, որ ռուսաստանցի խոհարարը պատրաստում էր հայկական կերակրատեսակ, իսկ հայաստանցի խոհարարը` ռուսական։ Սա ազդակ է ուսումնասիրելու երկրների գաստրոնոմիկ ավանդույթները, մշակույթը։ Սա շատ կարևոր է»,– նշեց Գելիբտերմանը։
Նա նաև ընդգծեց, որ միջոցառումը բարենպաստ միջավայր ստեղծեց հայ շեֆ խոհարարներին և ռեստորատորներին մեկտեղելու համար, ինչպես նաև նրանց կողմից գոյություն ունեցող հարցերի և Ռուսաստանում հայկական խոհանոցի, իսկ Հայաստանում էլ` ռուսական խոհանոցի, զարգացման միջոցները նշելու համար։
Ընկերական մրցույթին խոհարարներից ամեն մեկն իր կոլեգային տալիս է սեփական ժողովրդի երեք ավանդական կերակուրներից բաղկացած ցանկ, որից անհրաժեշտ է ընտրել մեկը և պատրաստել գագաթնաժողովի հյուրերի և փորձագիտական ժյուրիի համար։
Փորձագիտական ժյուրիի կազմում էին «Հայ խոհարարական ավանդույթների զարգացման և պահպանման» ՀԿ–ի նախագահ Սեդրակ Մամուլյանը, Ռուսաստանի խոհարարների ազգային ասոցիացիայի նախագահ Վիկտոր Բելյաևը և «Իմ քայլը» խմբակցության անդամ Ալեքսեյ Սանդիկովը։
Ռուս շեֆ խոհարար Անտոն Սալնիկովը որոշեցպատրաստել հայկական ուդոլի ճաշատեսակը, որը վերականգնվել է Մատենադարանի գրապահոցների ձեռագրերից, իսկ հայ շեֆ խոհարար Կամո Գույումջյանն ընտրեց ռուսական ավանդական կուլեբյական։
Շեֆ խոհարարների կողմից պատրաստված ճաշատեսակները գնահատելուց հետո Սեդրակ Մամուլյանը և Վիկտոր Բելյաևը ստորագրեցին համագործակցության համաձայնագիր «Հայ խոհարարական ավանդույթների զարգացման և պահպանման» ՀԿ–ի և Ռուսաստանի խոհարարների ազգային ասոցիացիայի միջև։
Գելիբտերմանի խոսքով, համաձայնագրի ստորագրումը շատ կարևոր է, այն կարևոր քայլ է Հայաստանի համար Շեֆ խոհարարների համաշխարհային կազմակերպությանն (WACS) անդամակցելու ճանապարհին։ «Ես առաջ չեմ վազի, բայց ինձ թվում է, որ դա տեղի կունենա Սանկտ Պետերբուրգում 2020թ–ի ամռանը կայանալիք Համաշխարհային կոնգրեսի ժամանակ։ Հայաստանը հանդիսավոր կերպով կմիանա շեֆ խոհարարների համաշխարհային ամենամեծ համայնքին»,– ասաց նա։ –0–
