ԵՐԵՎԱՆ, 9 դեկտեմբերի./Նովոստի–Արմենիա/. Հայկական հյուրանոցները և ռեստորանները պետք է մեծ ուշադրություն դարձնեն կադրերի կրթության մակարդակին և պետական ստանդարտների պահպանմանը, Երևանում հայտարարեց Ռուսաստանի ռեստորատորների և հյուրանոցատերերի ֆեդերացիայի նախագահ Իգոր Բուխարովը։
«Ռեստորանային և հյուրանոցային բիզնեսի ոլորտի կադրերի կրթության խնդրի համալիր լուծումը կարող է տուրիզմի զարգացման մեծ հնարավորություններ բացել։ Պետք է ստեղծել կրթության ընդհանուր համակարգ` անհրաժեշտ մակարդակն ապահովելու համար», – նշեց Բուխարովը քննարկման ժամանակ, որը կազմակերպվել էր Հայաստանում անցկացված Ռուսական գաստրո շաբաթի շրջանակում։
Կադրերի խնդրի մասին
Նրա խոսքով, Հայաստանում, Ռուսաստանում և հետխորհրդային տարածքի շատ երկրներում դեռևս 1980–ականներից կա բարձր որակավորում ունեցող կադրերի խնդիր, երբ ռեստորանային ցանցի ընդլայնմանը զուգահեռ առաջացավ որակավորված կադրերի պակաս։
«1990–ականների սկզբին` տուրիզմի ոլորտում գրանցված նոր բումի տարիներին, սկսեցին բացվել տուրիստական ուղղվածություն ունեցող ֆակուլտետներ և ինստիտուտներ, սակայն դրանցից շատերը չէին ապահովում անհրաժեշտ պահանջները։ Կարելի է փաստել, որ այսօրվա դրությամբ այդպես էլ չի հաջողվել ստեղծել ազգային խոհարարական դպրոցներ», – նշեց նա։
Բուխարի խոսքով, որակյալ կադրերի պատրաստման հարցում աղետալի վիճակի պատճառը մասնագիտացված բուհերի բարձր ուսման վարձն է։
«Ծնողները նախընտրում են, որպեսզի իրենց երեխաները սովորեն այնպիսի մասնագիտություններ, որոնք անհրաժեշտ կլինեն ապագայում։ Բուհն ավարտելուց հետո տղաները գնում են բանակ, իսկ աղջիկներն ամուսնանում են, ու միայն շատ քչերն են շարունակում խորանալ իրենց մասնագիտության մեջ։ Իսկ եթե ձեռնարկությունն է բարձրացնում աշխատակիցների որակավորումը, ապա նրանք ստանում են նոր պարտականություններ, ինչը փոխում է իրավական հարաբերությունները գործատուի և աշխատակցի միջև», – ասաց նա։
Փոխհարաբերություններ պետության հետ
Ինչպես նշեց Բուխարովը, որակավորված կադրերի պակասն ու նրանց ցածր որակը կարող են հանգեցնել դժվարությունների պետության հետ հյուրանոցների և ռեստորանների փոխհարաբերություններում։
«Ոլորտի դերակատարները պետք է համագործակցեն ոչ միայն միմյանց, այլև պետության հետ, ոչ թե պետությանը համարեն իրենց հիմնական ընդդիմախոսը։ Ամեն դեպքում պետությունը կվերցնի հարկերն ու կներկայացնի նոր պահանջներ», – նշեց նա` անհրաժեշտ համարելով, որպեսզի պետությունը թույլ տա ոլորտի ձեռնարկություններին ինքնակարգավորվել և վարի պատժամիջոցների ճկուն քաղաքականություն։
«Անթույլատրելի է, որպեսզի ռեստորանն ու հյուրանոցը հայտնվեն պատժամիջոցների տակ մեկ–երկու աշխատակցի սխալի պատճառով։ Չափից մեծ ճնշման և բարձր հարկերի դեպքում ոլորտը կարող է ընդհանրապես չզարգանալ», – ընդգծեց նա։
Նրա խոսքով, պետական ստանդարտները պետք է լինեն ռացիոնալ և բխեն ոչ միայն սպառողների, այլև բիզնեսի իրավունքների ապահովման անհրաժեշտությունից։
«Անթույլատրելի է պահանջել խոհանոցում օգտագործել բացառապես յոդացված աղ այն դեպքերում, երբ վարունգի վրա այդ աղն այլ կերպ է ազդում», – որպես օրինակ նշեց Բուխարովը։
Ռուսական գաստրոնոմիկ շաբաթը Հայաստանում անցկացվել է դեկտեմբերի 2–6–ը: Այս նախագիծն ուղղված է արտերկրում Ռուսաստանի գաստրոնոմիկ մշակույթի առաջխաղացմանը և իրականացվում է 2015 թվականից Միջազգային էնոգաստրոնոմիկ կենտրոնի կողմից` նախագահ Լեոնիդ Գելիբտերմանի գլխավորությամբ:–0–
