ԵՐԵՎԱՆ, 26 դեկտեմբերի./Նովոստի-Արմենիա/. Ամանորի նախաշեմին բրենդ շեֆ Գայանե Բրեիովան «Food and Wine» պորտալին է ներկայացրել ամանորյա երկու բաղադրատոմս` հայկական շեշտադրումով:
Մածունով, հատապտուղներով կամ թարխունով դոնդող
4 չափաբաժնի համար
Բաղադրիչներ
Մածուն – 1,2 կգ
Ազնվամորի – 100 գ
Մոշ – 100 գ
Դոշաբ (թթի օշարակ) – 5 գ
Ժելատին – 40 գ
Շաքարավազ – 200 գ
«Մածունը մի մթերք է, որով հայերը հպարտանում են և բավականին շատ են օգտագործում, բայց այսպիսի աղանդերը կզարմացնի նույնիսկ իմ հայրենակիցներին»,- նշեց Բրեիովան:
Եվ այսպես, աղանդերի պատրաստման համար մածունի մեջ ավելացնում ենք շաքարավազ, առանձին 300-400 մլ ջրում թրջում դոնդողը, հանում ջրից, հետո հալեցնում միկրոալիքային վառարանում:
«Դոնդողն ավելացնում ենք մածունի մեջ, հետո փորձարկում ենք կատարում: Մենք փորձել ենք թարխունի տերևներով, հատապտուղներով, մանդարինով: Դնում ենք սառնարան 1-2 ժամով, կտրատում ենք խորանարդիկներով կամ շրջանակներով, ինչպես ձեզ դուր է գալիս, և վրան մի փոքր դոշաբ ենք լցնում»,- ասաց Բրեիովան:
Շոկոլադեխորիզովգաթա
Շերտավոր խմորի բաղադրիչները
Սերուցքային կարագ կամ մարգարին – 200 գ
Ձվի դեղնուց – 4 հատ
Օղի – 70 մլ
Քացախ – 70 մլ
Ալյուր – 4 բաժակ
Ջուր – 1,5 բաժակ
Աղն` ըստ ճաշակի
Կիտրոնաթթու – 2 գ
Խմորի քսուքի բաղադրիչները.
Սերուցքային կարագ կամ մարգարին – 800 գ
Ալյուր – 200 գ
Միջուկի բաղադրիչներ
Շաքարավազ – 200 գ
Սերուցքային կարագ – 150 գ
Ձվի դեղնուց – 1 հատ
Կակաո – 50գ
Ալյուր – 300-400 գ
Թարթար սոուսի բաղադրիչներ
Սերկևիլ – 60 գ
Հիլ (կարդամոն) – 1գ
Մեխակ – 1գ
Շաքարավազ – 20 գ
Պատրաստման եղանակը
Սկզբում պետք է պատրաստել շերտավոր խմորը: Դրա համար պետք է հարել կարագը ալյուրի հետ և բաժանել 12 մասի, քանի որ խմորի յուրաքանչյուր շերտին պետք է 3 անգամ քսուք քսել: Ալյուրով թասի մեջ կարագ քերել, ավելացնել ձվի դեղնուցը և խառնել մինչև համասեռ զանգված ստանալը: Ավելացնել աղը, կիտրոնաթթուն, օղին, քացախը և աստիճանաբար ավելացնել գոլ ջուրը: Հունցել խմորը և բաժանել այն 3 մասի:
Քսուքի պատրաստման համար անհրաժեշտ է կարագին ավելացնել ալյուրը: Խմորը գրդնակով բացել և վրան քսել ստացված զանգվածը: Ծրարաձև ծալել և թողնել սառնարանում 30 րոպե, կրկնել այս գործողությունը 3 անգամ:
Միջուկի պատրաստման համար անհրաժեշտ է հարիչով խառնել շաքարավազը, կարագը, ձվի դեղնուցը, կակաոն և ալյուրը: Հետո գրդնակով բացել ստացված շերտավոր խմորը և վրան դնել միջուկը` ամբողջությամբ ծածկելով շերտը: Ռուլետի նման փաթաթել, վրան ձվի դեղնուց քսել և թեքությամբ կտրատել: Տապակի վրա թխել 20 րոպե 200 С աստիճանի տակ:
Մինչև ռուլետը թխվում է, սերկևիլը կտրատել խորանարդիկներով, ավելացնել շաքարավազը, համեմունքները և խաշել:
Մատուցելիս զարդարել ռուլետը սերկևիլով և մածունից պատրաստված պաղպաղակով:
