ԵՐԵՎԱՆ, 14 հունվարի./Նովոստի-Արմենիա/. Մսի բուսական փոխարինիչների համաշխարհային շուկայի ծավալը 2030 թ-ին կաճի մինչև 100 մլրդ դոլարի` 2018 թ-ին գրանցված 19 մլրդ դոլարի համեմատ: Նման կանխատեսում է անում CFRA ընկերությունը, որին հղում է կատարում MarketWatch-ը:
Ինչպես հայտնում է Ինտերֆաքսը, 2019 թ-ի հոկտեմբերի դրությամբ, վերլուծաբանները բուսական փոխարինիչների ամերիկյան շուկայի ծավալը գնահատել են 2,4 մլրդ դոլար:
Ի սկզբանե, մսի բուսական փոխարինիչները կապում էին, առաջին հերթին, առողջ ապրելակերպի հետ: Հիմա սպառողները փոխել են պրոտեինի նկատմամբ իրենց մոտեցումը և ներառում են այն իրենց նախաճաշում: Նման կարծիք է հայտնել ամերիկյան Tyson Foods-ի սպառողական պահանջարկի ուսումնասիրության ղեկավար Ռիզա Շվարցը:
Մսի փոխարինիչները սկսել են ավելի հաճախ հայտնվել նաև երեխաների ափսեներում: Tyson Foods-ի` բուսական սպիտակուցների հիման վրա արտադրվող մթերքի ստորաբաժանումը` Raised&Rooted-ը նման սպառողներին առաջարկում է մսի բուսական փոխարինիչներով նագեթսներ: Նոյեմբերին Raised&Rooted-ի արտադրանքը վաճառվել է ԱՄՆ-ի 7000 խանութներում:
Մսի փոխարինիչների արտադրությամբ զբաղվող ամերիկյան Beyond Meat ընկերության համար կարևոր է համի գործոնը: Ընկերությունը նաև ընդգծում է, որ իր արտադրանքն էկոլոգիական է: Արագ սննդի որոշ ռեստորաններ նույնպես սկսել են իրենց հաճախորդներին առաջարկել մսի բուսական փոխարինիչներից պատրաստված ուտեստներ: Օրինակ, Beyond Meat-ը համագործակցում է այնպիսի խոշոր ռեստորանային ցանցերի հետ, ինչպիսիք են KFC-ն, Tim Hortons-ը, Subway–ը և Dunking Brands-ը:-0-
