ԵՐԵՎԱՆ, 29 հունվարի./Նովոստի–Արմենիա/. Ֆոնդյուն հալեցված պանրի մի քանի տեսակներից պատրաստվող տաք ուտեստ է` գինու և մշկընկույզի ավելացմամբ։ Այն շվեյցարական խոհանոցի` մեծ ժողովրդականություն վայելող ազգային կերակրատեսակ է։ Ֆոնդյուն հիմնականում ուտում են խմբով հավաքվելիս` պանրային խյուսի մեջ թաթախելով հացը, կարտոֆիլը կամ այլ մթերքներ։
Դասական պանրային ֆոնդյու պատրաստելու համար ավելի լավ է սովորել պրոֆեսիոնալների մոտ։ Բայց մենք առաջարկում ենք փորձել ֆոնդյու պատրաստել հայտնի շեֆ խոհարար և հեռուստահաղորդավար Ջեյմի Օլիվերի բաղադրամտոմսով։
Բաղադրիչներ
- 2 սոխ
- Ձիթապտղի յուղ
- Ծովի աղ
- Թարմ աղացած սև պղպեղ
- 2 ճյուղ թարմ ծոթոր (ուրց)
- 50 մլ սպիտակ գինի կամ սիդր
- 400 գ չեդեր պանիր
- 400 գ գրյուեր պանիր
- 150 գ կապույտ պանիր
- 2 ճաշի գդալ թթվասեր
Պատրաստման եղանակը
Թավայի մեջ լցնել 2 ճաշի գդալ ձիթապտղի յուղ և դնել միջին կրակի վրա։ Մանր կտրատել սոխը և լցնել տապակի մեջ։ Անընդմեջ խառնելով` տապակել սոխը, մի պտղունց աղ և սև պղպեղ ավելացնել, և տապակել ևս 5 րոպե։ Ուշադրություն դարձնել, որ սոխը չհասցնի գույնը փոխել, այլ միայն փափկի։ Ընթացքում ավելացնել ծոթորն ու նույնպես տապակել։
Մեծ կաթսան դնել թույլ կրակի վրա և տաք ջուր լցնել (մոտ 5 սմ)։ Վրան դնել մեծ ջերմակայուն թասիկ` «շոգեբաղնիք» ստեղծելով, այնպես, որ ջուրը չծածկի այն։ Թասիկի մեջ գինի լցնել։
Այդ թասիկի մեջ ավելացնել պանրի ամբողջ զանգվածը, այն պետք է նախապես մանր կտրատել կամ քերիչով անցկացնել։ Պանիրը կսկսի դանդաղ հալչել։ Գործընթացն արագացնելու համար անհրաժեշտ է ժամանակ առ ժամանակ խառնել։ Նախքան պանիրն ամբողջությամբ կհալչի, տապակի պարունակությունն ավելացնել թասիկի մեջ, այդ թվում` թթվասերը և մի քանի ճաշի գդալ եռացրած ջուր։ Շարունակել խառնել մինչև պանիրն ամբողջությամբ հալի։–0–
