ԵՐԵՎԱՆ, 1 փետրվարի. /Նովոստի-Արմենիա/. Ի՞նչ են ուզում բոլոր ուսանողները: Հանձնել քննությունները, աշխատանք գտնել և, իհարկե, լավ ուտել: Ներկայացնում ենք մի քանի ուտեստի բաղադրատոմս, որոնք հնարավոր է պատրաստ փոքր բյուջե ունենալու դեպքում:
Պաստա լոլիկով և ռեհանով
Շատ նրբաճաշակ է հնչում, բայց իրականում՝ սովորական սպագետի է (բայց մենք ոչ ոքի չենք ասի, այնպես չէ՞): Այս ուտեստի պատրաստման համար անհրաժեշտ է միայն սպագետի, լոլիկ, սոխ, սխտոր, ռեհան, աղ և պղպեղ:
Տապակել մանր կտրատած սոխն ու սխտորը, ավելացնել կտրատած լոլիկը և ռեհանը (ցանկալի է օգտագործել թարմ ռեհան, բայց չորացրածը նույնպես կլինի): Սպագետին եփել, ավելացնել պատրաստի սոուսի մեջ, խառնել և մի քիչ թողնել: Ահա և վերջ. իտալական պաստան պատրաստ է:
Կարտոֆիլով, սնկով և պղպեղով բանջարեղենային ռագու
Բանջարեղենը շատ օգտակար է, բացի այդ այն կօգնի գումար տնտեսել: Սեզոնային բանջարեղենը թանկ չէ, բայց դրանից կարելի է բազում ուտեստներ պատրաստել: Օրինակ՝ ռագու:
Այն շատ հեշտ է պատրաստել: Մաքրած կարտոֆիլը եփում ենք 7-8 րոպե, հետո խորանարդաձև կտրատում ենք և տապակում մեծ թավայի մեջ մինչև դառնա մուգ ոսկեգույն: Կարտոֆիլին ավելացնում ենք սխտոր և բուլղարական պղպեղ ու տապակում ենք ևս 3 րոպե: Հետո ավելացնում ենք խորանարդաձև կտրատած լոլիկը և սունկը, պատրաստում ենք ևս 5 րոպե և մի փոքր թողնում ենք: Մատուցելիս կարելի է վրան կանաչի լցնել:
Շոկոլադե կեքս
Քաղցրացրեք դաժան ուսանողական կյանքը հասարակ շոկոլադե կեքսով: Բաղադրիչները շատ չեն և, հավանաբար, կլինեն ձեր սառնարանում:
Եվ այսպես, խառնում ենք 2 ձու, կես թեյի գդալ սոդա, մեկ ճաշի գդալ կիտրոնի հյութ, կես բաժակ ալյուրը, 70-100 գ ոչ քաղցր յոգուրտ կամ մածուն և 2 ճաշի գդալ կակաո: Հարում ենք բոլոր բաղադրիչները մինչև միասեռ զանգված ստանալը, լցնում ենք ափսեների մեջ և թխում ջեռոցում 20-25 րոպե 150 աստիճանի տակ՝ մինչև խմորը բարձրանա:-0-
