ԵՐԵՎԱՆ, 27 փետրվարի. /Նովոստի-Արմենիա/. Հայաստանում փետրվարի 24-ից սկսվել է Մեծ պահքը, որը կշարունակվի մինչև ապրիլի 12-ը: Չնայած սահմանափակումներին, Պահքի ճաշացանկը կարելի է դարձնել բազմազան և լիարժեք: Food&Wine-ը ներկայացնում մի քանի խորհուրդներ և բաղատրատոմսեր:
Խավարտների բազմազանություն
Հասարակ հնդկաձավարից, բրնձից և բանջարեղենից բացի, որպես խավարտ կարելի է օգտագործել հայկական արիշտան, բրնձի լապշան, սոբա (հնդկաձավարի լապշա) և ուդոն (ցորենի ալյուրից լապշա):
Օրինակ, Պահքի համար արիշտան կարելի է տապակել բուսայուղով, սոխով և սնկով: Սոբան համադրեք տարբեր սոուսների հետ: Այն նաև կարելի է շոգեխաշել սնկի և կարմիր սոխի հետ: Ուդոնը կարելի է պատրաստել բանջարեղենով, իսկ բրնձի լապշան համեղ է և´ որպես աղցանի հումք, և´ տաք ձևով՝ քաղցրաթթու սոուսով: Կարելի է նաև ավելացնել կուսկուս, բլղուր, կինոա, ոլոռ, լոբի, ոսպ և սիսեռ:
Ուտեստներին սոուսներ ավելացրեք
Բուսական սոուսները և հավելումները կարող են նոր համ փոխանցել սովորական ուտեստներին: Պահքին կարելի է օգտագործել սոյայի և քաղցրաթթու սոուսներ, բալզամիկ քացախ, ինչպես նաև աջիկա, դասական ֆրանսիական մանանեխ:
Պահքի ճաշացանկի հիանալի հավելում կդառնա իտալական պեստո սոուսը: Այն պատրաստման համար կպահանջվի կանաչ ռեհան, մաղադանոս, պարմեզան, մայրու ծառի ընկույզներ, սխտոր, ծովի խոշոր աղ և ձիթապտղի յուղ: Պեստոն հատկապես լավ է համադրվում լապշայի և կանաչ ձիթապտղի հետ:
Նախաճաշի համար ընտրեք շիլա
Շիլաները կօգնեն ոչ միայն բազմազանություն մտցնել սննդակարգում, այլև անցնել ճիշտ սննդակարգի, եթե պահպանել նախաճաշին և Պահքից հետո շիլա ուտելու սովորությունը: Շիլան պատրաստվում է ջրով՝ մրգերի, հատապտուղների և ընկույզների ավելացմամբ:
Օրինակ, պատրաստ լինելուց 2 րոպե առաջ վարսակի մեջ կարելի է ավելացնել բանան կամ խնձոր և ծածկել կափարիչով: Վարսակը կարելի է նաև համադրել կիվիի, անտառային հատապտուղների, ընկույզի կամ չրերի հետ:
Մի մոռացեք ընթացքում թեթև ուտելու մասին
Թեթև ուտելն օգնում է խուսափել քաղցի զգացումից և գրագետ ձևով կազմակերպել սննդակարգը: Այս նպատակով կարելի է օգտագործել միրգ, հատապտուղներ, ընկույզ և չրեր, որոնք հարուստ են վիտամիններով, ամինաթթուներով, միկրո և մակրոէլեմենտներով, որոնք անհրաժեշտ են օրգանիզմին:
Ընթացքում թեթև սնվելու համար որպես տարբերակ կարող են լինել նաև չրերով գլանակները, որոնք կարելի է պատրաստել տանը վարսակի փաթիլներից, խուրմայից, ծիրանաչրից, բալի չրից, չամիչից, ընկուզեղենից, խնձորի հյութից, դարչինից և ալյուրից:
Բոլոր չորամրգերը թրջել: Առանց կորիզի խուրման, չամիչը, ծիրանաչիրն առանձին տաք ջրով թրջել և թողնել 15 րոպե: Խուրման ջրի հետ հարել բլենդերում մինչև այն շիլայի վերածվի, տեղափոխել կաթսայի մեջ՝ ավելացնելով խնձորի հյութ և դարչին: Խյուսը եռացնել և մի քանի րոպե մարմանդ կրակի վրա եփել՝ թեթև խառնելով, ինչից հետո թողնել սառչի: Վարսակի փաթիլները թխել ջեռոցում 170 աստիճանի տակ 10-12 րոպե: Չորացնել չամիչը և ծիրանաչիրը, մանր կտրատել ընկուզեղենի հետ: Միացնել բոլոր բաղադրիչները, գլանակներ ձևավորել, ամանի վրա ալյուր ցանել և վրան շարել գլանակները, ինչից հետո թխել 10-12 րոպե:
Կազմեք Պահքի ճաշացանկ
Կերակրացանկում միօրինակությունից ու գաղափարների պակասից խուսափելու համար կազմեք Պահքի ճաշացանկ, որը կօգնի ընտրել տարբերակներ ամեն օրվա համար: Նման ճաշացանկի օգնությամբ հնարավոր է ունենալ լիարժեք սննդակարգ և խուսափել ամեն օր նույն ուտեստները պատրաստելուց: Հարմարության համար կարելի է առանձին ցանկերով գրանցել խավարտները, աղցանները, ճաշերը, տաք ուտեստները, քաղցրը և այլն:-0-
