ԵՐԵՎԱՆ, 20 մարտի./Նովոստի-Արմենիա/. Երկար ժամանակ տանը մնալով` մեծանում է ուտելու կամ ինչ-որ համեղ ճաշատեսակ պատրաստելու ցանկությունը: Ցածր ֆիզիկական ակտիվության հետ մեկտեղ այդ ցանկությունը հանգեցնում է ավելորդ կիլոգրամների կուտակման:
Դիետոլոգ Գայանա Շահխաթունին հատուկ Food&Wine պորտալի համար ներկայացրել է «տնային կարանտինի» պայմաններում սննդակարգը գրագետ կազմելու գաղտնիքներն և այն միջոցները, որոնց օգնությամբ կարելի է փոխարինել ֆիզիկական ակտիվությունն ու պահպանել կազմվածքը:
Ավելի շատ կանաչեղեն, ավելի քիչ՝ քաղցրավենիք
Դիետոլոգն առաջին հերթին խորհուրդ է տալիս խմել ավելի շատ ջուր. դա կօգնի ոչ միայն պահպանել օրգանիզմի առողջությունը, այլև պաշտպանվել վիրուսային հիվանդություններից: Ընդ որում կարևոր է, որ ջուրը լինի գոլ կամ մի փոքր տաք, քանի որ այդպես այն ավելի լավ կյուրացվի:
«Եկել է գարունը և դրա հետ միասին շատացել է կանաչեղենը, ինչի շնորհիվ կարելի է չզգալ քաղց ու օրգանիզմն ապահովել մեծ քանակի բջջանյութով»,- նշել է Շահխաթունին:
Նրա խոսքով, ցանկացած կանաչ մթերքում, հատկապես կանաչեղենի մեջ, կա շատ քանակի բջջանյութ, որը նպաստում է սննդի յուրացմանը: Այդ պատճառով սննդակարգում անհրաժեշտ է շեշտադրում անել կանաչեղենի բոլոր տեսակների վրա՝ և′ թարմ, և′ տապակած, բայց ձեթի քիչ քանակությամբ կամ ընդհանրապես առանց ձեթի։
«Փորձում ենք սննդակարգից բացառել բարձր կալորիականությամբ մթերքները, որոնց թվում են յուղերի բոլոր տեսակները, ուտում ենք ամեն ինչ յուղազրկված։ Ինչպես նաև բացառում ենք սպիտակ ալյուրն ու արագ ածխաջրերը, մասնավորապես՝ շաքար պարունակող ցանկացած մթերք»,- խորհուրդ է տալիս դիետոլոգը։
Շահխաթունին քաղցրի կոմպենսացման համար առաջարկում է օգտագործել ավելի շատ չիր, որի մեջ շաքարի փոխարեն ֆրուկտոզա է, ավելի շատ ուտել բանջարեղեն, թթու մրգեր, ինչպես նաև ձու, ձուկ և միս (ցանկալի է հավի, քանի որ դրա մեջ քիչ կալորիաներ կան)։
Օրը բաժանում ենք երեք մասի և 6-ից հետո ուտում ենք միայն սպիտակուցներ
Դիետոլոգը խորհուրդ է տալիս սնվելու ռեժիմ կազմել՝ բաժանելով օրը երեք մասի։ Մինչև 12:00-ն ուտել հիմնականում ածխաջրեր, օրինակ՝ թթու մրգեր, չրեր, ընկուզեղեն և այլն։
Մինչև 15:00-ն ավելի շատ օգտագործել կաթնամթերք` մածուն, յուգուրտ, կաթնաշոռ, որոնք կօգնեն նաև լրացնել կալցիումի պակասը։ Իսկ դրանից հետո ուտել միս, ձուկ, ձու։
«Սակայն ողջ օրվա ընթացքում ակտիվորեն օգտագործում ենք բջջանյութ։ Նույնիսկ առավոտյան կարելի է ուղղակի հազար լվանալ, դնել սեղանին և չարազի նման ուտել։ Կարելի է վերցնել ուրիշ կանաչի, բրոկոլի և ցանկացած կանաչ բանջարեղեն»,- ասել է նա։
Շահխաթունին մատնանշել է, որ ամենակարևոր և հասարակ ձևը, որ կօգնի չգիրանալ, ժամը 18:00-ից հետո ուտել միայն սպիտակուցներ։
«Եթե քաղցած չեք, ապա ոչինչ մի կերեք, դա ավելի լավ է։ Կարող եք մի բաժակ կանաչ թեյ խմել։ Իսկ եթե քաղցած եք, ապա ցանկալի է ուտել միայն սպիտակուցներ` ձվի սպիտակուց, մի փաքր կտոր հավի միս, յուղազրկված կաթնաշոռ»,- ասել է նա։
Դիետոլոգն ընդգծել է, որ երեկոյան ոչ մի դեպքում չի կարելի ուտել միրգ, չիր և մեղր
Բանջարեղենը պետք է հում ուտել, իսկ միսը` երկար եփել
Ինչպես խորհուրդ է տալիս դիետոլոգը, սննդակարգում բանջարեղենի 80%–ն հնարավորության դեպքում պետք է լինի հում` աղցանների տեսքով, քանի որ այդպես վիտամիններն ակտիվ են մնում։
«Եթե որոշել եք բանջարեղենը եփել, ապա ցանկալի է դրանք կիսահում լինեն` օրինակ սունկը կարելի է եփել ջեռոցում», – ասաց Շահխաթունին։
Ինչ վերաբերում է մսին, ապա դիետոլոգը կոչ է անում այն երկար եփել` դրանից առաջ նախօրոք սառեցնելով և հալեցնելով այն, ինչի շնորհիվ կարելի է խուսափել վնասակար բակտերիաներից, իսկ եթե ուզում եք նիհարել, ապա պետք է օգտագործել անյուղ միս, հատկապես հավ կամ ձուկ։
Պարում ենք ու զբոսնում
Ֆիզիկական ակտիվության պակասը դիետոլոգը խորհուրդ է տալիս լրացնել պարի կամ բաց տարածքում զբոսնելու միջոցով։ «Երաժշտություն միացրեք, մտածեք դրականի մասին և պարեք։ Եթե հիմա հնարավոր չէ գնալ մարզասրահ կամ լողավազան, ապա պետք է պարել տանը` բաց պատուհանների մոտ կամ զբոսնել այգիներում, որտեղ քիչ մարդ կա», – խորհուրդ է տալիս Շահխաթունին։–0–
