ԵՐԵՎԱՆ, 3 ապրիլի./Նովոստի-Արմենիա/. Երևանում մեկնարկում է Հայաստանում առաջին DeliveryFest-ը, որի նպատակն է աջակցել երևանյան ռեստորաններին կորոնավիրուսի տարածման հետևանքով ստեղծված նոր պայմաններում: Այս մասին հայտնել է Gastronomic Camp Armenia-ի հիմնադիր Աննա Մազմանյանը:
«Տեսնելով, թե ինչ դրության մեջ է հիմա ռեստորանային բիզնեսը, մենք չենք կարող անգործ մնալ և ամենամեծ բանը, որ կարող ենք անել նրանց համար, առցանց աջակցություն ցուցաբերելն է»,- նշել է Մազմանյանը:
Ամեն ռեստորան կներկայացնի ճաշատեսակների երեք ընտրանի (սեթ)՝ գնային տարբեր կատեգորիաներում (բազմաթիվ ռեստորաններ կարող են ընտրանիների հետ առաջարկել, օրինակ, գարեջուր կամ գինի), սպասվում են հետաքրքիր մրցույթներ, մրցանակներ, վարպետության դասընթացներ և բազմաթիվ այլ առաջարկներ:
«Մենք առանձին պատմելու ենք ամեն ռեստորանի և ներկայացված սեթերի մասին: Լիահույս եմ, որ կվերցնենք նաև օնլայն հարցազրույց շեֆ խոհարարներից, և գուցե, ռեստորատորներից»,- նշել է նա:
Ընդ որում, ինչպես հայտնել է Մազմանյանը Food&Wine պորտալին, մրցույթներ կկազմակերպվեն ոչ միայն ռեստորանների, այլև երևանցիների համար, ովքեր կլինեն փառատոնի և՛ հյուրերը, և՛ ժյուրին:
«Օրինակ, դուք պատվիրում եք որևէ սեթ ինչ-որ ռեստորանում: Տանն օրիգինալ ձևով մատուցում եք և լուսանկարը հրապարակում՝ նշելով #DeliveryFest հեշթեգը կամ ուղարկում մեզ: Մենք լուսանկարը հրապարակում ենք մեր էջում և մարդիկ գնահատում են այն՝ լայքերի միջոցով: Ամենաշատ լայք հավաքած լուսանկարը կարժանանա մրցանակի»,- նշել է Մազմանյանը:
Փառատոնի շրջանակում առցանց ռեժիմով իրենց փորձով կկիսվեն սոմելյեներ, շեֆ խոհարարներ, PR-ի և մարկեթինգի մասնագետներ` Ֆրանսիայից, Իտալիայից, Ռուսաստանից, Դանիայից և այլ երկրներից:
Հանդիսատեսը կարող է ծանոթանալ ռեստորաններին և Երևանում իրականացվող առաքման հնարավորություններին ու պատվիրել ներկայացված սեթերը: Հեռարձակումներն իրականացվելու են փառատոնի Instagram-յան էջում, մանրամասն տեղեկությունները կհրապարակվեն Facebook-յան էջում:
«Անգամ տանը նստելով` մենք կարող ենք գոնե այսպես աջակցել մեր ոլորտին: Կարծում եմ, որ մենք շատ հաճախ էինք խոսում բիզնեսի սոցիալական պատասխանատվության մասին: Հիմա անհրաժեշտ է, որպեսզի ռեստորանների հաճախորդներն ու հյուրերն աջակցեն ոլորտին», – նշել է Մազմանյանը: Հայաստանում մարտի 16–ից ապրիլի 14–ը հայտարարվել է արտակարգ դրություն՝ երկրում կորոնավիրուսի տարածումը կանխելու նպատակով, ինչի կապակցությամբ մարտի 24–ին ժամը 23։59–ից Հայաստանում գործում են քաղաքացիների տեղաշարժման և տնտեսական գործունեության իրականացման նոր սահմանափակումներ, որոնք, պարետի հանձնարարականով (նախնական մարտի 24-ից միչև մարտի 31-ը ժամանակահատվածի փոխարեն) երկարացվել են մինչև ապրիլի 12-ը ներառյալ:
Հայաստանում ապրիլի 3-ի դրությամբ գրանցվել է կորոնավիրուսով վարակման 736 դեպք։ 43 մարդ բուժվել է։ Արձանագրվել է մահվան 7 դեպք:–0–
