ԵՐԵՎԱՆ, 9 ապրիլի./Նովոստի–Արմենիա/. Չիզքեյքը շատ համեդ և բավականին հայտնի աղանդեր է։ Մենք այն հիմնականում պատվիրում ենք սրճարաններում, ռեստորաններում և չենք էլ մտածում, որ չիզքեյք կարող ենք պատրաստել նաև տանը։
«Խոհարարական դասընթացներ` առանց տնից դուրս գալու» նյութերի շարքի շրջանակում առաջարկում ենք ինքնուրույն պատրաստել «Նյու Յորք» դասական չիզքեյք։
Բաղադրիչներ
Միջուկի համար
- Առնվազն 33% յուղայնությամ թթվասեր – 50 գրամ
- 33% յուղայնությամբ կաթի սերուցք – 100 գրամ
- Փափուկ սերուցքային պանիր – 700 գրամ
- Վանիլ – 1–2 թեյի գդալ
- Շաքարավազ – 60 գրամ
- Ձու – 3 հատ
Հիմքի համար
- Սերուցքային կարագ – 120 գրամ
- Թխվածքաբլիթ – 300 գրամ
- Շաքարավազ – 30 գրամ
- Աղացած մշկընկույզ – 1 թեյի գդալ
- Աղացած դարչին – 1թեյի գդալ
Պատրաստման եղանակը
Հիմքը պատրաստելու համար թխվածքաբլիթը մանր փշրել բլենդերի օգնությամբ կամ բլիթները դնել սեղանին և գրտնակել, փշրանքները խառնել փափկեցրած կարագի խորանարդիկների հետ, ավելացնել շաքարավազ, աղացած մշկընկույզն ու դարչինը, լավ խառնել։
Պատրաստի զանգվածը դնել տապակի մեջ և չիզքեյքի ձև տալ` զամբյուղի նման։ Տաքացնել ջեռոցը 150 աստիճան, միջին հատվածում դնել տապակը, իսկ ստորինում` ջրով լի մեծ հրակայուն աման։ Եփել 15 րոպե, թողնել, որ սառչի։
Միջուկը պատրաստելու համար խառնել թթվասերը, սերուցքը, սերուցքային պանիրը, վանիլն ու շաքարավազը։ Մեկ–մեկ ավելացնել ձուն, յուրաքանչյուր ձվից հետո զանգվածը խառնել միքսերով։ Միջուկը լցնել թխած հիմքի վրա, եփել մեկ ժամ, ինչից հետո թողնել չիզքեյքը ջեռոցում ևս 15 րոպե, հետո բացել ջեռոցն ու թողնել ևս 15 րոպե։ Հետո պատրաստի աղանդերը դնել սառնարանը 6–10 ժամ` չհանելով տապակից։
Չիզքեյքը կարելի է մատուցել տարբեր տոբինգներով` կարամելային, սիրոպով, մուրաբայով և ոչ միայն։
Բարի ախորժակ։
