ԵՐԵՎԱՆ , 13 ապրիլի./Նովոստի-Արմենիա/. Նոր տիպի կորոնավիրուսի հետ կապված սահմանափակումների պատճառով մարդիկ ստիպված են երկար ժամանակ անցկացնել տանը։ Իսկ դա ինչ-որ համեղ ուտեստ պատրաստելու և ընտանիքին ուրախացնելու լավ առիթ է ։
«Food&Wine» պորտալը շարունակում է «Խոհարարական դասընթացներ` առանց տնից դուրս գալու» նյութերի շարքը, որտեղ հրապարակվելու են թեթև և ախորժելի ուտեստների բաղադրատոմսեր, որոնք ոչ միայն հեշտ է պատրաստել տնային պայմաններում, այլև չեն փչացնի կազմվածքը։
Բաղադրիչներ
- Չամիչ – 70 գ
- Կաթնաշոռ – 200 գ
- Սերուցքային կարագ – 150 գ
- Ձու – 3 հատ
- Շաքարավազ – 150 գ
- Ալյուր – 160 գ
- Փխրեցուցիչ – 1 թեյի գդալ
- Աղ – դանակի ծայրով
Պատրաստման եղանակը
Լվացած չամիչը լցնել թասիկի մեջ, վրան տաք ջուր լցնել և թողնել 10 րոպե։ Ինչից հետո քամել, լցնել թղթե անձեռոցիկի վրա և թողնել, որ չորանա։ Կաթնաշոռը անցկացնել մաղով։ Կարագը կտրատել փոքր խորանարդիկներով և, խառնելով, հալեցնել միջին կամ թույլ կրակի վրա, թողնել, որ հովանա։
Ձուն հարել մինչև փրփրի, քիչ-քիչ ավելացնել շաքարավազը և հարել՝ մինչև միասեռ զանգված ստանալը։ Կաթնաշոռն ու հալեցրած կարագն իրար խառնել, ավելացնել այդ զանգվածը ձվին և հարել։
Խմորի մեջ մաղել ալյուրը փխրեցուցիչի և աղի հետ, խառնել, ավելացնել չամիչը և նորից խառնել։ Կեքսի համար հատուկ թղթե ամանների մեջ լցնել խմորը փոքր բաժիններով և երեսը հարթեցնել։ Թխել ջեռոցում 30-40 րոպե՝ 180 աստիճանի տակ։ Մատուցելուց առաջ պատրաստի կեքսերի վրա կարելի է շաքարի փոշի ցանել։
Բարի ախորժակ։
