ԵՐԵՎԱՆ, 14 ապրիլի./Նովոստի-Արմենիա/. Նույնիսկ ամենահասարակ ուտեստին կարելի է նոր բույր փոխանցել յուրահատուկ սոուսի օգնությամբ։ Լավ սոուսը (և խոսքն ամենևին էլ կետչուպի մասին չէ) բազմազան կդարձնի հասարակ մթերքներից բաղկացած ճաշացանկը։
«Խոհարարական դասընթացներ` առանց տնից դուրս գալու» նյութերի շարքի շրջանակում առաջարկում ենք սովորել պատրաստել պեստո սոուս, որը հիանալի հավելում կդառնա պաստայի, ձիթապտղի և բազում այլ մթերքների և ուտեստների համար։
Բաղադրիչներ.
- Կանաչ ռեհան - 100 գ
- Ձիթապտղի ձեթ - 120-150 մլ
- Պարմեզան - 30-40 գ
- Մայրու ընկույզներ - 20-30 գ
- Սխտոր - 1-2 պճեղ
- Աղ
- Պղպեղ
Պատրաստման եղանակը.
Ռեհանը կտրատել՝ նախօրոք հեռացնելով ծլերի կոշտ մասերը։ Սխտորը մաքրել և մանր կտրատել։ Պարմեզանը անցկացնել մանր քերիչով, ընկույզները մի փոքր տապակել չոր թավայում՝ միջին կրակի վրա։ Ռեհանը, սխտորը և մի պտղունց աղ լցնել բլենդերի մեջ և մանրացնել՝ աստիճանաբար, փոքր բաժիններով ավելացնելով ձեթը։
Հետո ավելացնել ընկույզները և մանրացնել՝ լցնելով մնացած ձեթը։ Պատրաստի սոուսի մեջ ավելացնել պարմեզանը, աղը և պղպեղը։ Պեստոն պահել մանրէազերծ բանկայի մեջ, սառնարանում, մեկ շաբաթից ոչ ավել։
Բարի ախորժակ։
