ԵՐԵՎԱՆ, 30 մայիսի./Նովոստի–Արմենիա/. Իտալիան պիցցայի և պաստայի երկիր է։ Չնայած դրան, իտալացիներն ունեն ամուր առողջություն և սլացիկ կազմվածք։
Աշխարհահռչակ Սոֆի Լորենը բազմաթիվ անգամ ասել է. «Ես պարտավոր եմ պաստային այն ամենի համար, ինչ տեսնում եք»։ Ի դեպ, 85–ամյա դերասանուհին հիանալի տեսք ունի և անգամ դարձել է Barilla մակարոնեղենի գովազդային արշավի դեմքը։ Այդ իտալական կախարդությունն ամենևին էլ կախարդություն չէ, այլ մի քանի պարզ կանոն, որոնց կարող է հետևել յուրաքանչյուր մարդ։ Harper's Bazaar –ը բացահայտում է իտալուհիների սլացիկ կազմվածքի գաղտնիքները։
Բնական մթերք
Իտալացիների սննդակարգը հիմնված է միջերկրածովյան դիետայի կանոնների վրա, իսկ ավելի հստակ` դիետան է հիմնված իտալացիների սննդակարգի կանոնների վրա։ Այս հայտնի սննդակարգն ավելի շատ նման է գեդոնիզմի տոնի, քան դիետայի։ Պարտադիր մթերքների ցանկում են թարմ միրգն ու բանջարեղենը, ձուկը, թռչնամիսը, ձիթապտղի յուղը, կաթնամթերքը` յոգուրտն ու պանիրը, կարմիր գինին, պաստան ու հացաբուլկեղենը։ Ի դեպ, մասնագետները զարմացած պարզել են, որ միջերկրածովյան դիետայի շնորհիվ կարելի է ոչ միայն պահպանել քաշը, այլև նվազեցնել այն։
Սակայն կան որոշ կանոններ, որոնց պետք է ուշադրություն դարձնել։
Միջերկրածովյան դիետայի դեպքում գրեթե բացառվում են շաքարավազը, հագեցած ճարպերը, կարմիր միսը, կիսաֆաբրիկատներն ու ոչ բնական մթերքները։ Մակարոնեղենը պատրաստվում է ամբողջահատիկ ցորենի ալյուրից, պիցցայի և պաստայի տոմատի սոուսը պատրաստվում է Իտալիայում աճող լոլիկից, միրգն իր հերթին լավագույն այլընտրանքն է աղանդերին։
Ճաշը` որպես ծես
Երբ գալիս է ճաշի ժամը, դուք դժվար թե ինչ-որ իտալացու հանդիպեք փողոցում։ Այդ արևոտ երկրի բնակիչների համար ճաշը սուրբ ծես է, հանուն որի կարելի է մի կողմ թողնել բոլոր գործերը և մոռանալ բոլոր հոգսերը։ Իտալացիները միշտ ճաշում են նույն ժամին, ուտելիս երբեք չեն շտապում, վայելում են ուտելիքի ամեն կտորը և չափից շատ չեն ուտում։ Պաստայով ափսեի հետ անպայման մատուցվում է մեկ բաժակ (բայց միայն մեկ բաժակ) կարմիր գինի և հաճելի զրույց։ Դուք երբեք չեք տեսնի իտալացու, ով արագորեն կուլ է տալիս ուտելիքը և միաժամանակ YouTube-ով շոու է նայում։ Ուտելիքի նման դանդաղ, մտածված ընդունումը թույլ է տալիս, որ այն լավ մարսվի և բացառում է շատ ուտելու հնարավորությունը։
Ոչ միայն պաստա
Այո, պաստան իսկապես իտալացիների սննդակարգի հիմնական բաղադրիչն է, սակայն չի հանդիսանում դրա հիմքը։ Իտալացիներն ուտում են մեծ քանակությամբ թարմ բանջարեղեն, որը հարուստ է վիտամիններով, հանքանյութերով և բջջանյութով, որն իր հերթին բարելավում է մարսողությունը և մաքրում օրգաիզմը տոքսիններից։ Լիարժեք ճաշը կոմպենսացվում է համեստ նախաճաշով և ընթրիքով։ Իտալացիներն առավոտը սկսում են մեկ բաժակ էսպրեսսոյով և փոքր թխվածքով, իսկ ընթրիքին առհասարակ ածխաջրեր չեն ուտում, դրա փոխարեն ընտրում են դիետիկ ձկան կամ թռչնամսի փոքր բաժին և բանջարեղենային աղցան։
Ակտիվ ապրելակերպ
Ֆիզիկական ծանրաբեռնվածությունը շատ կարևոր է սլացիկ կազմվածքի և առողջության պահպանման համար։ Ըստ վիճակագրության՝ իտալացիներն ամենաակտիվ ազգերից մեկն են։ Նրանք զբոսնում են, վազում, լողում, հեծանիվ են քշում, պարում են և ֆիթնեսի են հաճախում։ Դա այն է, ինչ նրանք սովորել են մանկուց, ինչը վաղուց դարձել է կենսակերպ, հետևաբար չի ընկալվում որպես ավել ինչ–որ բան։ Եթե դուք եղել եք Իտալիայում, հավանաբար, ուշադրություն եք դարձրել նրան, որ նույնիսկ մեծահասակներն անպայման զբոսնում են քաղաքի փողոցներում կամ ծովափին։ Նման անդադար ակտիվությունը ոչ միայն օգնում է ավելի շատ կալորիաներ այրել և պահպանել կազմվածքը, այլև զգալիորեն բարելավում է առողջական ցուցանիշները։-0-
