ԵՐԵՎԱՆ, 4 հունիսի./Նովոստի-Արմենիա/. Մեկի համար վարսակի շիլան նախաճաշի ամենասիրելի տարբերակն է, մյուսի համար՝ ամենաատելի մթերքն աշխարհում: Եվ չնայած այն բոլորը չէ, որ հավանում են, վարսակի օգտակարությունն ակնհայտ է, գրում է Harper's Bazaar-ը:
Վարսակն առանձնանում է դանդաղ ածխաջրերի և բջջանյութի բարձր պարունակությամբ, ինչի շնորհիվ այն հիանալի տարբերակ է նախաճաշի համար։ Էներգիան և հագեցվածության զգացումը չեն սպառվում նվազագույնը կես օրվա ընթացքում՝ ազատելով թեթև ուտելու անհրաժեշտությունից: Բացի այդ, վարսակի հատիկի մեջ բավականաչափ բարձր է բուսական սպիտակուցների, վիտամինների և հանքանյութերի պարունակությունը (ինչպիսիք են մանգանը, մագնիումը, ցինկը և B խմբի մի քանի վիտամիններ): Այս նյութերը ոչ միայն հագեցնում են օրգանիզմը, այլև նպաստում սրտանոթային հիվանդությունների կանխարգելմանը:
Սակայն ձեր առավոտյան վարսակը կարող է էլ ավելի օգտակար դառնալ, եթե փաթիլները փոխարինեք մանրացված վարսակով: Այն պակաս հայտնի է, բայց վարսակի հատիկի ավելի առողջարար տեսակ է: Ամբողջահատիկի մանրացման համար օգտագործում են բարակ սրված պողպատե շեղբեր` չվնասելով հատիկի ամենաօգտակար մասերը՝ թեփը և սածիլները: Նման հատիկեղենն անվանում են մանրացված կամ շոտլանդական վարսակ (առաջին անգամ մշակման այդ մեթոդը կիրառել են հենց այնտեղ): Նման վարսակը համով շատ քիչ է տարբերվում մեզ համար սովորական վարսակի փաթիլներից, միայն թե պատրաստելու համար կրկնակի շատ ժամանակ է անհրաժեշտ:
Մանրացված վարսակն ունի մի շարք առավելություններ.
Օգնում է կարգավորել շաքարի մակարդակը
Բարձր գլյուկոզան մարդկության մեծ մասի խնդիրն է, որը հետագայում կարող է հանգեցնել տարբեր քրոնիկ հիվանդությունների զարգացման: Վարսակը լուծվող բջջանյութի և կայուն օսլայի հիանալի աղբյուր է: Այս նյութերը դանդաղ են յուրացվում, ինչն օգնում է կանխել շաքարի կտրուկ բարձրացումը:
Լավացնում է աղեստամոքսային տրակտի աշխատանքը
Վարսակը հարուստ է բջջանյութով և պրոբիոտիկներով, որոնք բարենպաստ են ազդում աղեստամոքսային տրակտի վրա: Նրանք պահպանում են առողջ միկրոբիոմը, ինչն ապահովում է աղեստամոքսային տրակտի ճիշտ աշխատանքը և կանխարգելում տարբեր հիվանդությունների զարգացումը:
Պահպանում է սրտի առողջությունը
Կանոնավոր օգտագործման դեպքում վարսակը նպաստում է «վատ» խոլեստերինի մակարդակի նվազմանը, կանխում է անոթների խցանումը ն և լավացնում արյան շրջանառությունը: Բացի այդ, հատիկեղենի բաղադրության մեջ մտնող ակտիվ նյութերն ամրացնում են սրտամկանը և նպաստում սրտանոթային հիվանդությունների կանխարգելմանը:
Նպաստում է քաշի նվազմանը
Քաշի նվազմանն առաջին հերթին նպաստում են քիչ կալորիաները, և վարսակը թեթևացնում է դրանց առաջացման գործընթացը: Բջջանյութով և դանդաղ ածխաջրերով հարուստ վարսակի հատիկը երկար ժամանակ պարգևում է հագեցվածության զգացում, ինչը թույլ է տալիս անընդհատ չուտել օրվա ընթացքում: Նախաճաշին մանրացված վարսակի շիլան կապահովի էներգիայով կես օրվա ընթացքում, ինչը կօգնի խուսափել ավելորդ կալորիաների օգտագործումից: -0-
