ԵՐԵՎԱՆ, 22 հունիսի./Նովոստի–Արմենիա/. Հունիսի 15-19-ը ավելի քան 50 փոքր և միջին ձեռնարկություններ Հայաստանից մասնակցեցին «United Fresh LIVE» սննդամթերքի միջազգային առցանց ցուցահանդեսին:
Առաջատար այս ցուցահանդեսին Հայաստանը ներկայանում է #FruitfullArmenia առցանց տաղավարով, որտեղ ցուցադրված է հայկական չրերի, պահածոների, բուսական թեյերի, օրգանական սերտիֆիկացված արտադրանքի լայն տեսականի, ինչպես նաև մեղր, գինի, թարմ հատապտուղներ, շոկոլադ, մուրաբաներ և այլն։
Միջոցառման կազմակերպիչն է հայտնի ամերիկյան «United Fresh Produce» ասոցիացիան։ Ցուցահանդեսը համախմբել է ընկերությունների 75 երկրներից՝ հնարավորություն ընձեռելով նրանց գործարար կապեր հաստատել միջազգային տարբեր շուկաների առաջատար կազմակերպությունների հետ, ուսումնասիրել գյուղատնտեսական մթերքի արտադրման, վերամշակման ու մատակարարման շղթաները և ծանոթանալ նորարարական լուծումներին՝ ուղղված արտադրողականության ու մրցունակության պահպանմանն ու բարելավմանը կորոնավիրուսային համավարակի պայմաններում։
Հայկական ընկերությունների մասնակցությունը հնարավոր է դարձել Արևելյան գործընկերություն՝ առևտրի համար պատրաստ. EU4Business-ի նախաձեռնության շրջանակում, որն իրականացվում է Առևտրի միջազգային կենտրոնի կողմից Եվրոպական միության ֆինանսական աջակցությամբ։–0–
