Փարավոնների ըմպելիքը կամ կարկադե թեյի հինգ օգտակար հատկությունները

ԵՐԵՎԱՆ, 15 հուլիսի. /Նովոստի-Արմենիա/. Կախարդական «Սուդանի վարդը» կամ «հիբիսկուսը» ասյպես կոչված կարկադե թեյն է։ Այս անսովոր մուգ կարմիր գույն ունեցող ըմպելիքը ոչ միայն հաճելի համ ունի, այլև հայտնի է մի շարք օգտակար հատկություններով։

Օրինակ՝ կարկադեն կարող է կանխել սկլերոզը, այն դրական է ազդում աղեստամոքսային տրակտի վրա։ Արևելքում համարում են, որ այն դեղամիջոց է բոլոր հիվանդությունների  համար, իսկ արաբները շատ բան գիտեն բժշկության մասին։

Ներկայացնում ենք կարկադեի հինգ կարևոր հատկություններն՝ ըստ Passion.ru ամսագրի։

1. Անոթների ամրացում

Հիբիսկուսի ծաղկաթերթերը պարունակում են անթոցիանիններ, որոնք կարկադեին տալիս են կարմրավարդագույն երանգ և ունեն P-վիտամինային ակտիվություն: Դրանք օգնում են ամրացնել արյան անոթների պատերը: Այս թեյի կանոնավոր օգտագործումը կարող է իջեցնել արյան ճնշումը, ինչը հատկապես կարևոր է հիպերտոնիկների համար:

Բայց հարկ է հիշել, որ արյան ցածր ճնշմամբ մարդիկ չպետք է շատ կարկադե խմեն:

2. Օգնություն աղեստամոքսային տրակտին

Կարկադեն դրական է ազդում աղեստամոքսային տրակտի և լյարդի գործունեության վրա: Թեյը կարգավորում է մարսողությունը և ունի հակաբակտերիալ հատկություն:

3. Իմունիտետ

Կարկադեում պարունակվող վիտամինները բարձրացնում են իմունիտետը, ունեն հակաբորբոքային և հակաբակտերիալ ազդեցություն: Դրանք նաև բարձրացնում են մարմնի դիմադրողականությունը մրսածության դեմ և օգնում են հավասարակշռել նյարդային համակարգը:

4. Սննդային թունավորման դեպքում

Փսխումով և փորլուծությամբ ուղեկցվող սննդային թունավորումից հետո կարկադեն կօգնի վերականգնել կալիումի պարունակությունը։ Բացի այդ, Սուդանի վարդի թուրմի մեջ պարունակվող կալիումը կարգավորում է ջրի բալանսը և պահպանում թթվա-ալկալիական հավասարակշռությունն օրգանիզմում։

5. Հագեցնում է ծարավն ամռանը

Կարկադեն ծարավը հագեցնելու հիանալի միջոց է: Տարօրինակ է հնչում, բայց շոգի ժամանակ տաք թուրմը հովացնում է հովհարի կամ օդափոխիչի նման, այն կարելի է նաև մատուցել սառը և առանց շաքարի:-0-