ԵՐԵՎԱՆ, 4 օգոստոսի. /Նովոստի-Արմենիա/. Ամանոր, շնորհանդես կամ ծննդյան օր՝ մի բաժակ փրփրուն շամպայնը կզարդարի ցանկացած տոն:
Պարզվում է, որ այս կայծկլտացող ըմպելիքն ունի իր ծննդյան օրը, այն նշվում է օգոստոսի 4-ին: Այս իրադարձության կապակցությամբ «Նովոստի-Արմենիա» գործակալությունը ներկայացնում է մի քանի հետաքրքիր փաստ շամպայնի մասին և կիսվում ֆրանսիացի սոմելյեների գաղտնիքներով:
Անսովոր ծննդյան օր
Շամպայնի ծննդյան օրը նշվում է նրա առաջին համտեսի օրը` օգոստոսի 4-ին: Ըստ լեգենդի՝ 1693 թվականի այս օրը, բենեդիկտյան վանական Պիեռ Պերինիոնը՝ Օտվիլյեր աբբայությունից, որը գտնվում է Շամպայն շրջանի սրտում, իր եղբայրներին առաջարկել է պղպջակներով անսովոր ըմպելիք, որը համարվում է ժամանակակից շամպայնի նախապապը:
Հենց Պերինիոնն է առաջին անգամ հայտնաբերել կուպաժավորման գաղտնիքները և առաջարկել գինին լցնել խցանափայտի կաղնու կեղևից պատրաստված խցանով շշերի մեջ: Նման անսովոր ըմպելիքի գյուտարարը շատ գովասանքների է արժանացել, նրա անունով է կոչվել շամպայնի էլիտար ապրանքանիշը՝ «Դոմ Պերինիոնը»:
Ֆրանսիական գաղտնիքներ սոմելյեներից
Շամպայնի համար առավել հարմար տարա է համարվում «ֆլեյտան»` հարթ բյուրեղապակուց կամ ապակուց պատրաստված նեղ, երկար բաժակը:
Պրոֆեսիոնալ սոմելյեները երբեք չեն լցնում բաժակն ամբողջությամբ և հետևում են, որ փրփուրը չբարձրանա բաժակի եզրից վերև: Շամպայնը միշտ մատուցվում է սառեցված, կախված խմիչքի տեսակից և տարիքից, մատուցման ջերմաստիճանը կարող է տատանվել 8-ից 12°C-ի միջև:
Շամպայնը կարելի է խմել ձկնային ուտեստների, սև խավիարի, բոված հացի կտորներով ֆուագրայի, մսով սոուսով մակարոնների, թեթև պանիրների, ծովամթերքներով ուտեստների, ինչպես նաև որոշ աղանդերների հետ:
Սակայն, կան մի շարք ուտեստներ, որոնց այս ըմպելիքն ընդհանրապես չի համապատասխանում: Դրանց թվում են ցիտրուսները, հոտավետ պանիրները, շատ աղի կամ շատ քաղցր ուտեստները, համեմունքով և սխտորով ցանկացած ուտեստ: Ինչպես նաև, շամպայնի հետ չեն համադրվում դառը շոկոլադը և սուրճը:
Շամպայն սիրող երկրներ
Փրփրուն գինին շատ երկրներում ամանորյա տոների հիմնական խորհրդանիշերից մեկն է: Աշխարհում այս ապրանքի սպառման ծավալի առումով Գերմանիան առաջատարի դիրքում է, որին հաջորդում է Ռուսաստանը, որն էլ իր հերթին զգալիորեն առաջ է անցնում ԱՄՆ-ից և Ֆրանսիայից: Փրփրուն գինիների խոշորագույն արտադրողներն են Իտալիան (դրա մասնաբաժինը կազմում է 22%), Ֆրանսիան (19%), Գերմանիան (15%) և Իսպանիան (12%):
Ինչ վերաբերում է Հայաստանին, ապա, ըստ վիճակագրության, անցած տարվա ընթացքում շամպայնի արտադրությունն աճել է 34.2%-ով: Այնուամենայնիվ, Հայաստանում մարդիկ նախընտրում են խմել այս ըմպելիքը զուտ սիմվոլիկ ձևով`մի բաժակ Ամանորին կամ ծննդյան օրվա կապակցությամբ:
Նրբահամ բույրեր իսկական տիկնանց համար
Զուր չէ, որ առանձնացնում են կանանց և տղամարդկանց համար նախատեսված խմիչքները: Համարվում է, որ իսկական տիկնայք նախընտրում են ավելի նրբահամ բույրեր, և շամպայնն այս իմաստով բացարձակ ֆավորիտ է:
Ալկոհոլի սիրահարները սխալմամբ շամպայնը դասում են թույլ ալկոհոլային խմիչքների շարքին՝ նույնիսկ այն համեմատելով գազավորված քաղցր ըմպելիքի հետ: Բայց, փաստորեն, շամպայնում ածխաթթու գազի բարձր պարունակությունը նպաստում է ալկոհոլի արագ ներծծմանը արյան մեջ: Ընդ որում, մեծ քանակությամբ շաքարը հանգեցնում է աննկատ և արագ արբելուն, նույնիսկ փոքր քանակությամբ խմիչքից:
Շաբաթը մեկ բաժակ
Գրեթե բոլորը համոզված են, որ շամպայնը մի խմիչք է, առանց որի հնարավոր չէ պատկերացնել ոչ մի տոնակատարություն: Բացի այդ, պարզվել է, որ փրփրուն գինիները օգտակար են սրտի և մաշկի համար: Դրանց ազդեցությունը զգալու համար բավական է շաբաթը մեկ անգամ խմել մի բաժակ շամպայն: Բայց դա ամենը չէ: Այս ավանդական տոնական ըմպելիքը բարձրացնում է տրամադրությունը, բարելավում է նյարդային համակարգի վիճակը, չի պարունակում կալորիաներ և ուժեղացնում է հիշողությունը: Պատահական չէ, որ հենց ինքը՝ Ուինսթոն Չերչիլը՝ Մեծ Բրիտանիայի վարչապետը, ով ըմպելիքների մեծ սիրահար ու գիտակ էր, շամպայնը ներառել է առաջին անհրաժեշտության չորս հիմնական իրերի մեջ:
