ԵՐԵՎԱՆ, 12 օգոստոսի․ /Նովոստի-Արմենիա/․ Հայ գինեգործներն այս տարի Խաղողօրհնեքին ընդառաջ նոր ավանդույթի սկիզբ են դրել․ նախապատվությունը տալ հայկական գինուն՝ նշելով այդ տոնը սիրելի մարդկանց հետ
Այս նախաձեռնությանը միացել է նաև Գինեգործության և խաղողագործության հիմնադրամը՝ հորդորելով բոլորին լինել հայ գինեգործի կողքին, ընտրել ու նախընտրել հայկական գինին։
Հայաստանի գինեգործության և խաղողագործության հիմնադրամի տնօրեն Զառա Մուրադյանը հիմնադրամի Facebook-յան էջում հրապարակած տեսանյութում ցույց է տվել Հայաստանի խաղողի ազգային կոլեկցիոն այգին, որտեղ կազմակերպությունն արդեն 2 տարի է պահպանում և աճեցնում է մոտ 350 խաղողի գենոտիպեր։
«Այս այգին մեր ամենաիսկական ձեռքբերումն է և կարևորագույն նշանակություն ունի երկրի գինեգործության կայուն զարգացման համար, քանի որ ծառայում է որպես հայկական խաղողի սորտերի շտեմարան՝ ի ապացույց նրան, որ հենց այս տարածաշրջանում են հազարամյակներ առաջ ծագել խաղողագործությունը և գինեգործությունը»,- ասել է նա։
Մուրադյանը հույս է հայտնել, որ այս տարի արդեն կստանան առաջին փորձնական գինիները կոլեկցիոն այգու խաղողի սորտերից։ Նա հիշեցրել է, որ հայկական գինին մեծ նշանակություն ունի թե՛ երկրի մշակույթի, թե՛ առհասարակ, տնտեսական զարգացման համար։
«Ֆերմերը մշակում է խաղողը, գինեգործը նոր կյանք է տալիս խաղողին, իսկ սպառողն ապրեցնում և շարունակություն է տալիս այս ամբողջ գործընթացին»,- ասել է Մուրադյանը։
Հիմնադրամի ղեկավարը նշել է, որ ոլորտի համաչափ զարգացման համար խիստ կարևոր է, որ մարդիկ՝ որպես գիտակից սպառող, ունենան ռազմավարական մտածելակերպ՝ ընտրելով հայրենական արտադրանքը։ Այդ պատճառով, Մուրադյանը Խաղողօրհնեք տոնին ընդառաջ հորդորել է բոլորին վերաիմաստավորել իրենց դերն ու ներդրումը հայկական գինեգործության զարգացման մեջ և նշել այդ տոնը հայկական գինիներով։
Հիշեցնենք, որ Խաղողօրհնեքը, երբ հայկական բոլոր եկեղեցիներում օրհնում են խաղողի առաջին բերքը, կամ Սուրբ Աստվածածնի Վերափոխման տոնի օրը՝ Հայ Առաքելական Եկեղեցու հինգ տաղավար տոներից չորրորդը և Տիրամորը նվիրված տոներից ամենահինը, այս տարի նշվում է օգոստոսի 16-ին։-0-
