ԵՐԵՎԱՆ, 20 օգոստոսի./Նովոստի-Արմենիա/. Մրգային սառը պաղպաղակը լավագույն աղանդերն է շոգ օգոստոսին: ԱՄՆ-ում, օրինակ, օգոստոսի 14-ին, քաղցրասերները նշում են «Մրգային պաղպաղակի օրը»:
Իսկ մենք մեր ընթերցողներին որոշեցինք պատմել, թե ինչպես է հայտնվել էսկիմոն և կիսվել բանանով ու ելակով պաղպաղակի բաղադրատոմսերով: Բայց նախ՝ մի փոքր պատմություն:
Համարվում է, որ օրիգինալ էսկիմոն հայտնվել է ավելի քան 100 տարի առաջ ԱՄՆ–ում: Դեռևս 1905 թ.-ին Ֆրենկ Էփերսոն անունով 11-ամյա մի տղա քաղցր ըմպելիք է պատրաստել, խառնել է այն փայտիկով և ամբողջ գիշեր մոռացել բակում: Ցուրտ է եղել, իսկ առավոտյան Ֆրենկը տեսել է, որ ըմպելիքը սառել է: Քաշելով փայտիկից՝ տղան հանել է սառած քաղցրավենիքը և կերել այն:
18 տարի անց Էփերսոնը պատենտավորել է մրգային սառույցը, որը անվանել է «popsicle» (անգլ. «pop» – քաղցր զովացուցիչ ըմպելք և «icicle» – սառցալեզվակ), որը համարվում է ժամանակակից էսկիմոյի նախահայրը։
Իսկ հիմա խոստացած բաղադրատոմսերը
Բանանով էսկիմո
Բաղադրիչներ
• բանան - 1 հատ
• յոգուրտ - 150 գ
• մեղր - 1 թեյի գդալ
Պատրաստման եղանակը
Բանանը կտրատել և բլենդերի մեջ հարել մեղրի ու յոգուրտի հետ: Ստացված խառնուրդը լցնել կաղապարների մեջ և, երբ այն մի փոքր պնդի, մեջը խրել փայտե ձողիկներ և դնել սառնարանը: Պաղպաղակը մի քանի ժամից պատրաստ է:
Ելակով էսկիմո
Բաղադրիչներ
• յուղոտ սերուցք (33%) - 200 մլ
• յուղոտ սերուցք (20%) - 200 մլ
• դեղնուց - 2 հատ
• ելակ կամ ցանկացած այլ հատապտուղ - 200 գ
• շաքարավազ - 100 գ
• կիտրոնի հյութ
Ելակը մանրացնել բլենդերի մեջ, ավելացնել կիտրոնի հյութը և կրկին հարել: 20% յուղայնությամբ սերուցքը տաքացնել կաթսայի մեջ, ավելացնել շաքարավազը և խառնել: Դեղնուցները սպիտակուցներից առանձնացնել, հարել փոքր քանակի տաք սերուցքի հետ, ապա լցնել դրանք տաք խառնուրդի մեջ և խառնել: Եփել մոտ 5 րոպե:
Խառնիչով հարել 33% յուղայնությամբ սերուցքը և ավելացնել դեղնուցի խառնուրդին: Ապա ավելացնել ելակի խյուսը և խառնել: Ստացված խառնուրդը լցնել կաղապարիկների մեջ, ձողիկներ խրել և մի քանի ժամով դնել սառնարանը:
Ջնարակի սիրահարները կարող են այն պատրաստել առանձին: Դրա համար հարկավոր է եռացող ջրի վրա հալեցնել մեկ սալիկ կաթնային կամ սև շոկոլադ՝ մի տուփ սերուցքային կարագի հետ: Պաղպաղակն ընկղմել հովացած ջնարակի մեջ, դնել յուղաթղթի վրա և սառեցնել ևս 2 ժամ:
