ԵՐԵՎԱՆ, 21 օգոստոսի./Նովոստի-Արմենիա/. Առավոտյան սուրճը հայերի համար անփոխարինելի է, և առավոտը հստակ ասոցացվում է «սուրճ» բառի հետ: Բայց քչերը գիտեն, թե ինչպես կարելի է խմել առավոտյան սուրճն՝ առանց օրգանիզմին վնասելու:
Հայաստանում անհնար է գտնել գոնե մեկ մարդու, ում ծանոթ չէ սուրճի համը կամ դրա պատրաստման եղանակը: Առավոտյան սուրճ խմելու պրոցեսը հայերի համար մի ամբողջ ծիսակարգ է: «Նովոստի-Արմենիա» գործակալությունը ներկայացնում է երեք խորհուրդ, թե ինչպես կարելի է առավոտյան սուրճ խմել՝ առանց օրգանիզմին վնասելու:
Առավոտյան սուրճի օգուտը
Առավոտյան սուրճի օգուտի մասին քննարկումները չեն դադարում: Գիտնականների մեծ մասը պնդում է, որ ճիշտ օգտագործելիս սուրճը բարենպաստ ազդեցություն է ունենում օրգանիզմի վրա: Այն բարելավում է ուղեղի աշխատանքը, հաղորդում է առույգություն ու մեծացնում է աշխատունակությունը: Մի շարք ուսումնասիրություններ ցույց են տվել, որ սուրճը հատկապես օգտակար է տարեց մարդկանց համար: Այն նվազեցնում է այնպիսի հիվանդությունների ռիսկը, ինչպիսիք են Ալցհայմերը և Պարկինսոնը:
Դատարկ ստամոքսին սուրճ խմելը մեծ սխալ է
Սուրճը շատ առավելություններ ունի, բայց չպետք է մոռանանք օրգանիզմի առանձնահատկությունների մասին: Շատերը սովորություն ունեն սուրճ խմել նախքան որևէ բան ուտելը: Դա մեծ սխալ է: Սուրճը պարունակում է մի քանի օրգանական թթուներ: Եթե նախաճաշից հետո սուրճ խմեք, ապա այն կբարելավի մարսողությունը: Առավոտյան դատարկ ստամոքսին ընդամենը մեկ անգամ սուրճ խմելով` իհարկե չենք գրգռի ստամոքսի լորձաթաղանթը և պատերը, բայց եթե դա դառնա սովորություն, ապա կվնասի առողջությանը:
Սուրճ խմելու ճիշտ ռեժիմ
Մեկ այլ սխալ է արթնանալուց անմիջապես հետո սուրճ խմելը: Հետազոտությունները ցույց են տալիս, որ պետք է սուրճ խմել արթնանալուց երկու ժամ հետո: Երբ սուրճ եք խմում քնից անմիջապես հետո, դուք արհեստականորեն աշխուժացնում եք ձեր օրգանիզմը՝ թույլ չտալով դա ինքնուրույն անել:
Օրգանիզմն ունի առույգության ռեժիմ մտնելու սեփական համակարգը: Այդ ընթացքում արտադրվում են մարդու համար կարևոր հորմոններ: Արթնանալուց անմիջապես հետո մեկ բաժակ սուրճը խախտում է այդ մեխանիզմը: Այդ իսկ պատճառով սուրճ խմելուց մեկ ժամ անց դուք հոգնածություն կզգաք և կրկին կցանկանաք սուրճ խմել: Այս ամենը կհանգենցի կախվածության: Ի դեպ, բժիշկները նաև արգելում են սուրճ խմել քնելուց երկու ժամ առաջ:
Առանց հավելումների սուրճը լավագույնն է
Սուրճին սերուցք կամ կաթ ավելացնելով` մենք ածխաջրերը համատեղում ենք ճարպերի հետ` այդկերպ գրեթե 50 անգամ ավելացնելով սուրճի կալորիականությունը: Դիետայի ժամանակ կամ ճիշտ սնվելիս խորհուրդ չի տրվում օգտագործել հավելումներով սուրճ: Բացի այդ, կաթով սուրճը վատ է յուրացվում օրգանիզմի կողմից: Որոշ մարդիկ փորձում են նվազեցնել կոֆեինի ազդեցությունը և կաթ են ավելացնում սուրճին: Բայց չարժե այդպես անել, քանի որ գիտականորեն ապացուցված է, որ սուրճը դրական է ազդում օրգանիզմի աշխատանքի վրա:
Սուրճի ճիշտ օգտագործման դեպքում այն կօգնի բարձրացնել աշխատունակությունը և կբարելավի մտավոր գործունեությունը: Հետազոտողները խորհուրդ են տալիս օրական 2-ից 4 անգամ սուրճ խմել, բայց միաժամանակ հիշել այս զարմանալի ըմպելիքի օգտագործման բոլոր կանոնները:
