ԵՐԵՎԱՆ, 22 օգոստոսի./Նովոստի-Արմենիա/. Գինեգործության պատմությունը, ըստ հնագետների, առնվազն ութ հազար տարեկան է և միահյուսված է քաղաքակրթությունների զարգացման հետ:
Հարյուրամյակների ընթացքում բանաստեղծների կողմից գովերգվող նրբաճաշակ ըմպելիքը շարունակում է մնալ ամենատարածվածներից մեկը՝ առանձնանալով մարդու օրգանիզմի համար մի շարք օգտակար հատկանիշներով:
Food & Wine պորտալը հավաքել է մի քանի հետաքրքիր փաստ, որոնք կարող են տպավորել ոչ միայն գինու սիրահարներին, այլև փորձառու սոմելյեներին:
Վիտամինների աղբյուր
Գինին պարունակում է բազմաթիվ կարևոր միկրո և մակրոտարրեր` կալիում, մագնեզիում, նատրիում, կալցիում, ցինկ, սելեն, պղինձ, քրոմ, ռուբիդիում և երկաթ, ինչպես նաև մի շարք վիտամիններ` C, B, 1, B2, B6, B12, PP, որոնք չափազանց բարենպաստ ազդեցություն ունեն մարդու օրգանիզմի վրա: Գինին նաև հարուստ է վիտամին P- ով, ինչը նպաստում է ասկորբինաթթվի յուրացմանը:
Օգուտ սրտի համար
Գիտականորեն ապացուցված է, որ մարդիկ, ովքեր ընթրիքի ժամանակ մի բաժակ կարմիր գինի են խմում, մի քանի անգամ նվազեցնում են սրտամկանի ինֆարկտի, սրտի անբավարարության և հարակից հիվանդությունների հավանականությունը: Գինին լայնացնում է արյան անոթները, իջեցնում արյան մեջ խոլեստերինի քանակը և ամրացնում է սրտի մկանները:
Հեմոգլոբինի ավելացում
Գինին նվազեցնում է արյան խտությունը, ավելացնում է էրիտրոցիտների քանակը՝ բարձրացնելով հեմոգլոբինի մակարդակը: Կարմիր գինին նաև հակաօքսիդանտների աղբյուր է, որոնք արգելակում են բջիջների վաղաժամ ծերացումը և կանխում են թրոմբների առաջացումը: Կարմիր գինու մեջ առկա ֆլավոնոիդները (ինչպես ելակում և շոկոլադում) օգնում են կարգավորել արյան մեջ շաքարի մակարդակը` կանխելով շաքարախտի առաջացումը:
Աղեստամոքսային տրակտի աշխատանքի բարելավում
Գինին մեծացնում է ախորժակը, ակտիվացնում է լեղու արտադրությունը և օգնում է ստամոքսում պահպանել թթվայնության կայուն մակարդակ: Կարմիր գինու մեջ պարունակվող տարրերը նաև ունեն տոնուսը բարձրացնող ազդեցություն, դրանք նվազեցնում են սթրեսի մակարդակը, խթանում են էնդոկրին գեղձերի աշխատանքը, ուժեղացնում նյութափոխանակությունը և բարելավում քունը:
Ամուր իմունիտետի համար
Գինին ուժեղացնում է իմունիտետը և օգնում է խուսափել մրսածությունից: Կարմիր գինու մեջ առկա հակաօքսիդանտներն օգնում են նվազեցնել շնչառական հիվանդությունների ռիսկը: Գիտնականները պարզել են, որ այն մարդիկ, ովքեր շաբաթական ավելի քան 14 բաժակ գինի են խմում, 40%-ով ավելի քիչ են մրսածություն ունենում, քան չխմողները:
Ուղեղի աշխատանք
Գիտնականները վաղուց ապացուցել են գինու օգտակար հատկությունները ուղեղի համար: Համարվում է, որ 150մլ չոր կարմիր գինի խմելը կարող է կանխել Ալցհայմերի հիվանդությունը, օրգանիզմում բջիջների ծերացումը և թուլամտության զարգացումը:
Հիշողության բարելավում
Ռեսվերատրոլը գինու մեջ պարունակվող հակաօքսիդանտ է, որն օգնում է բարելավել կարճաժամկետ հիշողությունը: Հետազոտողներն ուսումնասիրել են ռեսվերատրոլի ազդեցությունը և պարզել, որ արդեն 30 րոպե անց գիտափորձի մասնակիցներ ավելի լավ են հիշել բառերը, և նրանց ուղեղը սկսել է ավելի լավ աշխատել:
Աչքի առողջություն
Համաձայն վերջին ուսումնասիրությունների ՝ չափավոր գինի օգտագործող մարդկանց մոտ 32%-ով ավելի ցածր է կատարակտի զարգացման ռիսկը: Գինին նաև կանխում է արյան անոթների մուտացիան, ինչը կարող է հանգեցնել քաղցկեղային ուռուցքների առաջացման: Ռեսվերատրոլը օգնում է դանդաղեցնել աչքի անոթների ավելցուկի աճը և կանխել նորերի առաջացումը:
Ատամների ամրացում
Գինին ամրացնում է լնդերը, կանխում է ատամնափառի առաջացումը և թույլ չի տալիս վնասակար բակտերիաներին կպչել էմալին: Այնուամենայնիվ, մի մոռացեք, որ գինին թթվային մթերք է, ուստի դրա չափից շատ օգտագործումը կարող է վնասել ատամի էմալը։ Բացի այդ գինու գույնից կարող է ատամնափառ առաջանալ:
Ավելորդ քաշ
Կարմիր գինու մեջ պարունակվող պիցեատանոլ նյութը խանգարում է ճարպային բջիջների ձևավորմանը և օգնում է պահպանել առողջ քաշը: Ֆրանսիացի հետազոտողները պարզել են, որ կարմիր գինին օգնում է այրել ավելորդ ճարպը: Քնելուց առաջ մի փոքր կարմիր գինին, ամենայն հավանականությամբ, ձեր մարզումները կդարձնի մի փոքր ավելի արդյունավետ:
Զգուշացում
Այս ամենի հետ մեկտեղ չպետք է մոռանալ, որ գինու չափից շատ օգտագործումը, ինչպես ցանկացած այլ ալկոհոլի, կարող է լուրջ վնաս հասցնել առողջությանը: Առողջ եղեք
