ԵՐԵՎԱՆ, 22 օգոստոսի․ /Նովոստի-Արմենիա/․ Խորովածի փառատոնը, որն ամեն տարի անցկացվում է Հայաստանում, այս տարի կհետաձգվի, բայց կազմակերպիչները առաջարկել են խորովածի փառատոնը տոնելու մեկ այլ միջոց:
Ինչպես Food & Wine պորտալին հայտնեց «Հայ խոհարարական ավանդույթների զարգացման և պահպանման» հասարակական կազմակերպության և միջոցառման կազմակերպիչ Սեդրակ Մամուլյանը, խորովածի փառատոնն ամեն տարի նշվում է օգոստոսի նախավերջին կիրակի օրը, բայց կորոնավիրուսային համավարակի պատճառով այդ օրը անհնար է անցկացնել միջոցառումը:
«Մենք սպասում ենք, որ իրավիճակը փոխվի, և հնարավորություն լինի զանգվածային միջոցառումներ անցկացնել, որպեսզի փորձենք սեպտեմբերի վերջին անցկացնել հաջորդ՝ 12-րդ խորովածի փառատոնը», - ասաց նա:
Մամուլյանը ցավով նշեց, որ այս տարի օգոստոսի 23-ին տոնը չի նշվի, սակայն, կոչ արեց մարդկանց իրենց տանը, ամառանոցում խորոված պատրաստել և միանալ թեմատիկ ֆլեշմոբին ՝ #խորովածիմիջազգայինօր հեշթեգի ներքո:
Նա հիշեցրեց, որ օգոստոսի նախավերջին կիրակին արդեն հինգ տարի է, ինչ Խորովածի միջազգային օր է համարվում, և Ախթալան հռչակվել է խորովածի համաշխարհային մայրաքաղաք:
«Համեմատած աշխարհի բոլոր այն վայրերի, որտեղ խորովածի փառատոն է անցկացվում, իսկ դրանք շատ են, Ախթալան ունի խորքային արմատներ և հին պատմություն», - բացատրեց կազմակերպիչը քաղաքի ընտրությունը:
Ըստ նրա, իրենք շատ հարցեր են ստանում փառատոնի վերաբերյալ, քանի որ միջոցառմանը սպասողները և շահառուները ամեն տարի ավելի են շատանում։
«Հատկապես Ախթալայի շրջանի մեր հայրենակիցները ամեն տարի անհամբերությամբ սպասում են այս իրադարձությանը, քանի որ նրանք դրա ուղղակի շահառուներն են», - շեշտեց Մամուլյանը:
Կազմակերպիչն ասաց, որ եթե այս տարի հաջողվի փառատոնն անցկացնել, ապա այն կիրականացվի դասական ձևաչափով, ներառյալ գեղարվեստական մասը, ժողովրդական արվեստը, մրցույթները, հատուկ հյուրերը և շատ ավելին: -0-
