ԵՐԵՎԱՆ, 24 օգոստոսի./Նովոստի-Արմենիա/. Բուրավետ դեղձը ոչ միայն համեղ է, այլև պարունակում մի շարք վիտամիններ: Եվրոպայում այս միրգը գնահատվում է ըստ արժանվույն. մայրցամաքում ծառատունկերի մակերեսով դեղձը զբաղեցնում է երրորդ տեղը խնձորից ու տանձից հետո:
Դեղձի օգտակար հատկությունները
Այս կարմրաթուշ և բուրավետ միրգը խթանում է ուղեղի աշխատանքը, բարելավում է հիշողությունը և ավելացնում է ուշադրության կենտրոնացումը: Այն խորհուրդ է տրվում օգտագործել երեխաներին, հղիներին և ցածր հեմոգլոբինով մարդկանց: Դեղձը նաև օգտակար է ստամոքսային հիվանդություններով մարդկանց, չէ՞ որ այն միզամուղ ազդեցություն ունի և կարող է երիկամներից դուրս բերել ավազը:
Վիտամինների աղբյուր
Գիտե՞ք, արդյոք, որ մեկ դեղձն ապահովում է վիտամին C-ի օրական չափաբաժնի 3/4 –ը, ինչը թույլ է տալիս ամրապնդել իմունիտետը: Դեղձը նաև պարունակում է մեծ քանակի A և B վիտամիններ, ինչի շնորհիվ օրգանիզմի բջիջներում պահպանվում է խոնավությունը: Եթե ցանկանում եք թավշյա մաշկ ունենալ, ապա միանշանակ պետք է ձեր սննդակարգում դեղձ ավելացնեք:
Հայկական հողի դեղձը
Հրաբխային հողի, աղբյուրի զուլալ ջրի և այրող արևի շնորհիվ հայկական դեղձն առանձնանում է յուրահատուկ «արևային» համ ու հոտով: Դեղձի ծաղկման ժամանակ Արարատյան դաշտավայրը զարդարվում է նուրբ վարդագույնով: Բացի Արարատյան դաշտավայրից, Հայաստանում դեղձ են աճեցնում հիմնականում Վայոց Ձորի և Սյունիքի մարզերում:
Հետաքրքիր է, որ Չինաստանում և Ճապոնիայում դեղձի ծառն անվանում են «կենաց ծառ», իսկ դեղձի ծաղիկները խորհրդանշում են փափկություն, կանացիություն և մաքրություն:
Դեղձի կոմպոտի բաղադրատոմս
Ցավոք սրտի, բարդ է ողջ տարին վայելել թարմ դեղձի համն ու հոտը: Այդ պատճառով ամռանը կարելի է արևային մրգից կոմպոտ պատրաստել ու վայելել այն ողջ ձմեռ:
Ներկայացնում ենք դեղձի կոմպոտի պարզ բաղադրատոմս։
Բաղադրիչներ (3 լիտրանոց բանկայի համար)
- մանր դեղձեր – 12-14 հատ
- շաքարավազ – 500 գ
- ջուր – 2,2 լ
Պատրաստման եղանակը
Դեղձը ձեռքով տրորել՝ փշոտ մասը հեռացնելու համար և լավ լվանալ հոսող ջրի տակ, որոշ ժամանակ թողնել քամիչի վրա: Միրգը 2-3 տեղից ծակել պատառաքաղով, անհրաժեշտության դեպքում հեռացնել փափկած մասերը: Պատրաստի վիճակում դեղձերը տեղափոխել մաքուր բանկաների մեջ: Նախապես ստերիլիզացնել կափարիչները:
Կաթսայի մեջ եռացնել ջուրը, ավելացնել շաքարավազը և խառնել: Օշարակը հասցնել եռալու աստիճանի և եփել 1-1,5 րոպե մինչև շաքարավազն ամբողջությամբ հալվի:
Դեղձերով բանկայի մեջ եռացրած ջուր լցնել, ծածկել կափարիչով և թողնել 20 րոպե մնա՝ ծածկելով սրբիչով կամ թեթև ծածկոցով: 20 րոպե անց օշարակը հետ լցնել կաթսայի մեջ, հասցնել եռալու աստիճանի և եփել մեկ րոպե: Կրկին լցնել օշարակը բանկաների մեջ, պահածոյացնել, գլխիվայր շուռ տալ, ծածկել տաք վերմակով և թողնել մեկ օր մինչև սառչի:
