ԵՐԵՎԱՆ, 25 օգոստոսի./Նովոստի–Արմենիա/. Հայաստանում կստեղծեն հայկական խոհանոցի զարգացման հայեցակարգ, որի հիմնական նպատակն է խթանել հայկական խոհանոցի զարգացումը, սահմանել նպատակներն ու այդ ոլորտում իրականացվող պետական քաղաքականության խնդիրները։
Ինչպես Food & Wine պորտալին հայտնեց Տուրիզմի հայկական ֆեդերացիայի նախագահ Մեխակ Ապրեսյանը, հայեցակարգի ստեղծմամբ զբաղվում է «Հայ խոհարարական ավանդույթների զարգացման և պահպանման» հասարակական կազմակերպությունն ու Տուրիզմի հայկական ֆեդերացիան` ներգրավելով գործընկերների մասնավոր և պետական հատվածներից։
«Մեր խոհանոցը պետք է գնահատվի ըստ արժանվույն։ Դա պետք է և կարող է նպաստել հանրային առողջության լավացմանը, պատմամշակութային ժառանգության պահպանմանը, Հայաստանի տուրիստական մրցունակության բարձրացմանը, ինչպես նաև Հայաստանի միջազգային կարգավիճակի ամրապնդմանը», – ասաց նա։
Փորձագետը նշեց, որ Հայաստանում զբոսաշրջության ոլորտի վերականգնման գործընթացում հատուկ ուշադրություն պետք է դարձնել գաստրոտուրիզմին։
«Ազգային խոհանոցը մեր մշակույթի զգալի մասն է, հետևաբար գաստրոտուրիզմը ևս շատ լուրջ ներուժ ունի։ Տուրիզմի բոլոր տեսակները ներառում են ծանոթություն հայկական խոհանոցի հետ», – ասաց նա։
Ապրեսյանը հույս հայտնեց, որ շուտով հայեցակարգը կձևավորվի և կներկայացվի կառավարությանը։
«Հույս ունեմ, որ կառավարությունը կընդունի այդ հայեցակարգը, ինչը հիմք կդառնա անհրաժեշտ միջոցառումների իրականացման համար, թույլ կտա հայկական խոհանոցը դարձնել այն հիմնական գործիքը, ինչի շնորհիվ մենք կլուծենք մեր պետական քաղաքականության մի շարք խնդիրներ, այդ թվում` տուրիզմի ոլորտի խնդիրները», – եզրափակեց նա։
