ԵՐԵՎԱՆ, 4 սեպտեմբերի./Նովոստի–Արմենիա/. Հայաստանն առաջին անգամ մասնակցում է ռեստորանային սպորտի աշխարհի առաջնությանը։ Այս մասին ուրբաթ ասուլիսի ժամանակ ասաց Ռեստորանային սպորտի հայկական ֆեդերացիայի նախագահ, նախկին պատգամավոր Հայկ Բաբուխանյանը։
«Ռեստորանային սպորտի միջազգային ֆեդերացիան ստեղծվել է երեք տարի առաջ։ Արդեն նախորդ տարի ֆեդերացիայի նախագահ Ալեք Ռաբինովիչը (Իսրայել) հրավիրեց Հայաստանին դառնալ ֆեդերացիայի անդամ` մի պայմանով, որ այն կգլխավորի հայտնի մարդ, ով ներկա պահին չի զբաղվում քաղաքականությամբ», – ասաց Բաբուխանյանը։
Նրա խոսքով, առաջնությունը կանցկացվի այս տարի սեպտեմբերի 9–13–ը Սանկտ Պետերբուրգում, սակայն կորոնավիրուսի համավարակի հետ կապված սահմանափակումների պատճառով թիմերն առաջնությանը կմասնակցեն հեռահար։
Նրանք տեսանյութով կներկայացնեն նախօրոք պայմանավորված երեք ճաշատեսակների պատրաստման եղանակը և կուղարկեն ժյուրիին։ Չնայած ֆեդերացիայում ներառված է 30 երկիր, առաջնությանն այս տարի կմասնակցեն 13–ը։
«Սա ռեստորանային սպորտի աշխարհի երրորդ առաջնությունն է, բայց Հայաստանը մասնակցում է առաջին անգամ։ Առաջին առաջնության ժամանակ մեր երկիրը ներկայացնում էր սփյուռքը»,– ասաց Բաբուխանյանը։
Նա նաև պատասխանեց Food&Wine–ի հարցին, որը վերաբերում էր հաղթանակի շանսերին։
«Հույս ունենք, որ կհադթենք», – ասաց Բաբուխանյանը։
Ֆեդերացիայի փոխնախագահ, «Հայ խոհարարական ավանդույթների զարգացում և պահպանում» ՀԿ–ի նախագահ Սեդրակ Մամուլյանն իր հերթին նշեց, որ նման առաջնությանը մասնակցելն ինքնին հաղթանակ է։
Պորտալի խնդրանքով նա պատմեց ճաշատեսակների մասին, որոնք ներկայացրել է խոհարար Հովհաննես Մկրտչյանն իր օգնականի հետ։
«Առաջնության պայմանով, պետք է պատրաստել աղցան մի քանի բաղադրիչներով, լոլիկով և վարունգով, երկրորդ ճաշատեսակում պետք է լինի հավի կրծքամիս, իսկ երրորդում` հորթի փափկամիս։ Խոհարարը կարող է ինքնուրույն ընտրել ձևավորումը, խավարտն ու սոուսը», – ասաց Մամուլյանը` նշելով, որ լավ խոհանոցը միշտ ենթադրում է իմպրովիզ, քանի որ դա արվեստ է։
Նա կարծում է, որ մրցույթում հաղթանակը ոչ միայն ազդակ կդառնա ՀՀ–ում ռեստորանային բիզնեսի կատարելագործման համար, այլև կբարձրացնի երկրի տուրիստական գրավչությունն աշխարհում։
Շնորհանդեսի մասնակիցների ներկայությամբ պատրաստվեցին երեք ճաշատեսակներ, ինչպես նաև տեսագրվեց տեսաուղերձ ժյուրիի անդամներին և առաջնության մասնակիցներին։
P.S. Food&Wine–ի թղթակիցն ու օպերատորը համտեսեցին բոլոր երեք ճաշատեսակները, դրանք պարզապես անմահական համ ունեին։
