ԵՐԵՎԱՆ, 11 սեպտեմբերի./Նովոստի–Արմենիա/. Ձիթապտուղը կարևորագույն վիտամինների, հանքանյութերի, մակրոէլեմենտների և միկրոէլեմենտների հզոր աղբյուր է, որոնք կարևոր են ինչպես ոսկրերի առողջության, այնպես էլ մաշկի փայլի համար։
Harper's Bazaar–ը ներկայացնում է ձիթապտղի կարևոր հատկությունները։
Դանդաղեցնում է ծերացման պրոցեսը
Ձիթապտուղն ունի հզոր հակաօքսիդանտ հատկություններ։ Այն հարուստ է A և E վիտամիններով, որոնք պաշտպանում են օրգանիզմը ազատ ռադիկալներից` կանխելով օքսիդացման պրոցեսները, որոնք ոչ միայն կարող են դառնալ խրոնիկ հիվանդությունների զարգացման պատճառ, այլև զգալիորեն արագացնում են ծերացման պրոցեսը։ Ձիթապտղի հակաօքսիդանտային արժեքն ավելանում է լյուտեինի և պոլիֆենոլների բարձր պարունակության շնորհիվ։
Դրական է ազդում սրտի աշխատանքի վրա
Ձիթապտղի կանոնավոր օգտագործումն կանխարգելում է սիրտ–անոթային հիվանդությունների զարգացումը։ Օլեինային թթվի բարձր պարունակության շնորհիվ ձիթապտուղը խթանում է «լավ» խոլեստերինի աշխատանքն ու արգելափակում է «վատի» արտադրությունը։ Բացի այդ, ձիթայպտուղը հարուստ է բնական հանքանյութերով, որոնք ամրապնդում են սրտամկաններն ու անոթների պատերը։
Բարելավում է ոսկրերի վիճակը
Ձիթապտուղը բարելավում է ոսկրերի վիճակը և կանխում օստեոպորոզի զարգացումը։ Այս հիվանդությունն առաջանում է ոսկրային հյուսվածքի կառուցվածքում տեղի ունեցող տարիքային փոփոխությունների պատճառով, ինչի հետևանքով այն դառնում է ավելի փխրուն։ Օրգանիզմում նման փոփոխությունները սկսվում են արդեն 25 տարեկանից, այդ պատճառով կանխարգելիչ միջոցառումները պետք է սկսել որքան հնարավոր է շուտ։
Նպաստում է քաշի նվազեցմանը
Չնայած ձիթապտուղն ունի բարձր կալորիականություն, այն կարող է օգնել քաշի նվազեցման հարցում։ Պտուղները պարունակում են մոնոհագեցած ճարպաթթուներ` «օգտակար» ճարպեր։ Ուսումնասիրությունները հաստատել են, որ չհագեցած ճարպաթթուների (հագեցած ճարպաթթուների ամբողջական կամ մասնակի բացառման դեպքում) կանոնավոր օգտագործումը հանգեցնում է քաշի առողջ նվազեցմանը և կարգավորում է օրգանիզմում տեղի ունեցած բազմաթիվ պրոցեսներ։ Բացի այդ, ձիթապտուղը միջին շղթայական տրիգլիցերիդների աղբյուր է։ Դրանք լիպիդային միացություններ են, որոնք հեշտությամբ մասնատվում են օրգանիզմում և բարենպաստ են ազդում նյութափոխանակության վրա։ Հեշտ մարսվելու և յուրացվելու շնորհիվ օրգանիզմն այդ տրիգլիցերիդներն օգտագործում է որպես վառելիք, և դրանք չեն կուտակվում ճարպային նստվածքներում։
