ԵՐԵՎԱՆ, 18 հունիսի./Նովոստի–Արմենիա/. Շոգ եղանակին ախորժակը նվազում է, քանի որ օրգանիզմը կենտրոնացնում է ուժերը հովանալու և մարմնի նորմալ ջերմաստիճանն ապահովելու համար։ Մեր էներգիայի մեծ մասը ծախսվում է ջերմակարգավորման վրա, և աղեստամոքսային տրակտի աշխատանքը դանդաղում է, ինչի պատճառով էլ ախորժակը նվազում է, պակասում է նաև թքարտադրությունը, իսկ քաղցի զգացումը թուլանում է։
Բայց շոգ եղանակին կարևոր է ճիշտ սնվել էներգիան պահպանելու և վատ ինքնազգացողությունից խուսափելու համար։ «Նովոստի–Արմենիա» գործակալությունը ներկայացնում է հինգ մթերք, որոնք խորհուրդ չի տրվում ուտել շոգ եղանակին։
Կարմիր միս
Կարմիր միսը կարող է հանգեցնել փորացավերի դանդաղ նյութափոխանակության պայմաններում։ Պետք է նաև սահմանափակել սպիտակուցով հարուստ մյուս մթերքները։ Դրա փոխարեն ավելի լավ է շատ ուտել թարմ բանջարեղեն և միրգ, բուսական սպիտակուց, հավ կամ ոչ յուղոտ ձուկ։
Սառույցով հյութեր
Շոգ եղանակին ավելի լավ է հրաժարվել սառույցով հյութերից, քանի որ դրանք չեն հովացնում, այլ հակառակը` խանգարում են նորմալ ջերմակարգավորմանը։ Օրգանիզմը չի կարողանում յուրացնել չափազանց սառը հեղուկը։ Օրգանիզմը պետք է տաքացնի այն, ինչի համար էներգիա է ծախսում, որը նախատեսված է մարմնի նորմալ ջերմաստիճանն ապահովելու համար։ Ավելի լավ է խմել սենյակային ջերմաստիճանի հյութեր` մի փոքր սառը և նույնիսկ տաք։
Քաղցրավենիք
Քաղցրավենիքը պարունակում է մեծ քանակի շաքարավազ (որը միշտ չէ, որ բարձր որակի է), կոնսերվանտներ, համային հավելումներ և այլ բաղադրիչներ, որոնք դժվարամարս են։ Բացի այդ, քաղցրավենիքը կարող է հանգեցնել օրգանիզմի ջրազրկման, չէ՞ որ այն մարսելու համար պահանջվում է հեղուկ, որը «թանկարժեք է» շոգ եղանակին։ Այդ պատճառով շոգ եղանակին լավագույն ավանդերը միրգն է։
Յուղոտ պաղպաղակ
Պաղպաղակը պարունակում է մեծ քանակի կաթի յուղ, որը մեծ քանակի շաքարավազի հետ լրացուցիչ ծանրաբեռնվածության է ենթարկում աղեստամոքսային տրակտը։ Բացի այդ, այն օրգանիզմի վրա ազդում է սառցե հյութերի նման։ Յուղոտ պաղպաղակն ավելի լավ է փոխարինել ավելի թեթև և օգտակար մթերքով։
Միզամուղ մթերքներ
Շոգ եղանակին օրգանիզմի ջրազրկումից խուսափելու համար պետք չէ չարաշահել միզամուղ մթերքները։ Դրանցից են օրինակ մանգոն, ծնեբեկը, նեխուրը, հատապտուղները, բանանը, ձմերուկը, ծիրանը և այլն։ Դրանք օգտագործելիս կարևոր է խմել մեծ քանակի ջուր` ջրային բալանսն ապահովելու համար։–0–
