ԵՐԵՎԱՆ, 9 հուլիսի./Նովոստի–Արմենիա/. Սեփական գործի հիմնումը, հատկապես ռեստորանային ոլորտում, բարդ և ռիսկային պրոցես է։ Բայց սեփական նախագծի ստեղծման նկատմամբ ցուցաբերած գրագետ մոտեցումը կօգնի նվազեցնել ռիսկերն ու կնպաստի գործի առաջխաղացմանը։
Ռեստորանային մարկետոլոգ, Prprosto մարկետինգային գործակալության հիմնադիր Եվգենիա Նեչիտայլենկոն, որն մշակել է ավելի քան 200 ռեստորանային հայեցակարգեր, Gastro Camp Armenia–ի շրջանակում կազմակերպված դասընթացի ժամանակ կիսվել է բիզնես հիմնելու խորհուրդներով։
1. Հստակ հայեցակարգ և թիրախային լսարան
Նեչիտայլենկոն նշել է, որ պետք է հստակ հասկանալ, թե ում համար և ինչ եք բացում։ Նրա խոսքով, պետք է ունենալ հստակ ձևավորված հայեցակարգ, որի հիման վրա էլ ընտրվելու է տեղանքը։ Կամ հակառակը. ընտրել հայեցակարգ արդեն առկա տեղանքին համապատասխան։ Կարևոր է նաև հասկանալ, թե ով է ձեր թիրախային լսարանը։
2. Յուրօրինակ դիզայն և ֆիրմային ոճ
«Մտնում ես քաղցրավենիքի խանութ, իսկ այնտեղ համեղ ու գեղեցիկ փաթեթավորված կոնֆետներով երեք դարակ է։ Ձեր խնդիրն է` ընտրել ձեր կոնֆետը։ Իսկ ինչպե՞ս։ Այն պետք է ունենա հետաքրքիր անվանում, վառ փաթեթավորում, այն պետք է տարբերվի մնացած բոլորից։ Նույն ձև բիզնեսի դեպքում է։ Նա ևս համեղ կոնֆետ է, որը պետք է ճիշտ փաթեթավորել», – ասում է Նեչիտայլենկոն։
3. Հասկանալ հաճախորդի ցավոտ կետն ու վաճառել դրա միջոցով
«Վերցրեք մեկական մարդ ձեր թիրախային լսարանից, նստեք կողքը, բացեք մեկ շիշ գինի, զրուցեք, հարցրեք, թե ինչ է ուզում տեսնել, ինչ է ուզում ստանալ, ինչն է կարևոր իր համար, ինչի համար է պատրաստ գումար վճարել և ինչու կընտրի այս նախագիծը, այլ ոչ թե մյուսը», – խորհուրդ է տալիս փորձագետը։
Հարկավոր է ձևավորել հետադարձ կապ, համակարգայնացնել այն թղթի վրա և առանձնացնել ձեր բիզնեսի առավելությունները, ինչ կարելի է դրանից օգտագործել կամ մտածել սեփական որևէ բան` հաշվի առնելով հավաքված կարծիքները։
4. Գործողությունների պլան խնդիրների դեպքում
Մարկետոլոգը կոչ է անում երբեք չմոռանալ, որ ամենակարևորն առաջին տպավորությունն է։ Հյուրի առաջին այցն ամենաթանկն է, հյուրը գրեթե երբեք երկրորդ շանս չի տալիս ռեստորանին, այդ պատճառով կարևոր է անել ամեն ինչ, որպեսզի այդ այցի արդյունքում հյուրն իսկապես տպավորվի։
«Միշտ ցանկալի է նախօրոք մտածել, թե ինչ կանեք խնդիր ունենալու դեպքում։ Օրինակ, ճաշատեսակը շատ աղի է, և հյուրն ասում է, որ իրեն դուր չի եկել։ Ի՞նչ կարող եք անել։ Կարող եք հաճոյախոսություն ասել, նվիրել աղանդեր, ինչ–որ ավելի բան անել։ Մտածեք, թե ինչ եք անելու խնդիրների դեպքում, որոնք գրեթե միշտ առաջանում են բոլորի մոտ և պատրաստեք հատուկ սկրիպտ», – բացատրում է փորձագետը։
Ի՞նչ անել, եթե նախագիծը ցնցող արդյունքներ չի գրանցել
Նեչիտայլենկոն նաև խոսել է այն մասին, թե ինչ կարելի է անել, եթե նախագիծը հաջողություններ չի գրանցել և ինչպես վերակենդանացնել բիզնեսը։
Նրա խոսքով, կան զարգացման մի քանի բանաձևեր. առաջինը, պետք է ինքդ քեզ ճիշտ պատասխանես այն հարցին, թե ինչու նախագիծը հաջողության չհասավ, որն էր սխալը։
«Դուք բացվել եք սխալ վայրում, սխալ լսարանի համար, լավ չեք մշակել մենյուն, ունեք վատ սպասարկում։ Եվ եթե հասկանում եք, որ այս նախագիծն ուղղված չէ ճիշտ մարդկանց վրա, ապա ավելի լավ է այն փակել. որքան շուտ փակես, այնքան քիչ գումար կկորցնես», – ասում է նա։
Կա նաև մեկ այլ բաղկացուցիչ. միգուցե նախագիծը բացվել է բարդ ժամանակներում, երբ ինչ–որ բան է տեղի ունեցել։ Օրինակ, նախագծի մեկնարկը համընկել է ինչ–որ բացասական իրադարձության հետ, որը շեղել է մարդկանց ուշադրությունը։
«Այդ դեպքում պետք է պարզապես լինել խիզախ ու համբերատար և ոչ մի դեպքում չփոխել հայեցակարգը, եթե դու դրանում վստահ ես», – նշել է մարկետոլոգը։
Նեչիտայլենկոյի խոսքով, վատագույն տարբերակն է փոխել նախագծի հայեցակարգը` մենյուում ավելացնելով տարբեր ճաշատեսակներ, որոնք չեն համապատասխանում այդ հայեցակարգին։–0–
