ԵՐԵՎԱՆ, 14 սեպտեմբերի./Նովոստի–Արմենիա/. Գաստրոբակը մի վայր է, որտեղ կարելի է համտեսել ազգային խոհանոցի ավանդական ճաշատեսակներ, ծանոթանալ ավանդույթներին և, իհարկե, վայելել տեղացիների ջերմ հյուրընկալությունը։ Հայաստանում գաստրոբակերի նախագիծը մեկնարկել է 2019թ.–ին և զարգանում է երկրի ամբողջ տարածքում։
«Գաստրոբակ» նախագիծը գյուղական տուրիզմի գործնական նախաձեռնությունները որոնելու, զարգացնելու և խթանելու մոդել է, այն ստեղծում է բազային տուրիստական ծառայություններ` հիմնվելով գյուղական տնային տնտեսությունների վրա։ Նախագիծն ընդգրկում է Հայաստանի 6 մարզերը և ներառում է 20 շահառու։
Գաստրոբակերը հնարավորություն են տալիս ոչ միայն ծանոթանալ ազգային խոհանոցի ճաշատեսակներին, այլև համտեսել տեղական արտադրության գինի, որը պատրաստված են խաղողի տեղական սորտերից։
Գաստրոբակերը նաև առաջարկում են ժամանցի տարատեսակ ձևեր, որոնք ներկայացնում են մշակույթը, պատմությունն ու գյուղատնտեսությունը։ Դրանք հնարավորություն են ընձեռում զբոսաշրջիկներին ձեռք բերել նոր ու հետաքրքիր գիտելիքներ երկրի և մշակույթի մասին, ինչպես նաև ծանոթանալ տեղացիների հետ։
Հայկական գաստրոբակերն առաջարկում են հյուրերին մասնակցել բերքահավաքին, մեղրի ու տեղական խոտաբույսերից պատրաստված թեյի համտեսին, ազգային ճաշատեսակների պատրաստման վարպետության դասերին, պատրաստել թոնրի գաթա և լավաշ, օղի թորել, մեկնել տուրի Հայաստանի տեսարժան վայրերով և այլն։–0–
