ԵՐԵՎԱՆ, 22 սեպտեմբերի./Նովոստի–Արմենիա/. Հայաստանը կմասնակցի առաջնությանը, որը կանցկացվի սեպտեմբերի 24–26–ը Սոչիում: Առաջնությանը կմասնակցեն թիմեր 15 երկրներից, իսկ «Հայ խոհարարական ավանդույթների զարգացման և պահպանման» ՀԿ–ի նախագահ Սեդրակ Մամուլյանը կլինի ժյուրիի անդամներից մեկը:
«Մենք արդեն փորձ ունենք: 2020 թ.-ին մասնակցել ենք առաջնությանը և արժանացել արծաթե մեդալի: Հայաստանի հավաքականը գրավեց երկրորդ տեղը»,- ասաց Հայաստանի ռեստորանային սպորտի ֆեդերացիայի նախագահ, նախկին պատգամավոր Հայկ Բաբուխանյանը:
Նա ընդգծեց, որ այս տարի Հայաստանի թիմը հավակնում է լինել առաջինը: Բաբուխանյանը հայտնեց, որ առաջնության մասնակիցներին սպասվում է մրցութային երեք փուլ, որոնցից մեկի շրջանակում հայկական թիմը կներկայացնի Vanatur գինին:
Մամուլյանն իր հերթին նշեց, որ ռեստորանային սպորտը ձևավորվել է վերջերս Իսրայելում, և սպորտային հետաքրքրություն լինելուց բացի, այն հայկական ազգային խոհանոցը ներկայացնելու լավ միջոց է:
«Մեր պատրաստվածության մակարդակը բարձրացնելու համար այսուհետ Հայաստանում ամեն տարի նման մասշտաբային մրցումներ ենք անցկացնելու: Դա կնպաստի խոհարարի կարգավիճակի բարձրացմանը, բացի այդ, ամեն տարի կունենանք նոր թեկնածուներ (տարբեր մրցույթներում մասնակցելու համար, խմբ.)», - ասաց Մամուլյանը:
Հայաստանը առաջնությունում կներկայացնի Հովհաննես Մկրտչյանը: Անցած տարի հենց նա երկրին բերեց արծաթե մեդալ: Մասնակիցները պետք է սահմանված ժամանակահատվածում պատրաստեն իրենց նախընտրած ճաշատեսակները նախապես ներկայացված մթերքներից։
«Կա մթերքների պարտադիր ցանկ, որը դեռ հայտնի չէ, որից մասնակիցները պետք է պատրաստեն իրենց նախընտրած ուտեստը»,-ասաց նա ՝ պատասխանելով «Նովոստի-Արմենիա» գործակալության հարցին:
Անդրադառնալով գործակալության մեկ այլ հարցին այն մասին, թե առաջնությանը մասնակցելն ինչ կտա Հայաստանին` Բաբուխանյանը պատասխանեց, որ այն միջազգային մակարդակի միջոցառում է, իրադարձություն, որի մասին կգրեն բազմաթիվ լրատվամիջոցներ: Այդ տեղեկատվական հոսքում Հայաստանը ևս կհայտնվի: Մամուլյանը նշեց, որ առաջնության շնորհիվ Հայաստանը կներկայացվի միջազգային ասպարեզում, և դրա արդյունքը նույնն է, ինչ միջազգային երգի, պարի և այլ մրցույթներում:
Ֆեդերացիայի նախագահը, ի պատասխան «Նովոստի – Արմենիա» գործակալության հարցին, թե Հայաստանում ինչ վիճակում է գտնվում ռեստորանային բիզնեսը, ասաց, որ այս պահին Հայաստանի ռեստորանների որակի կտրուկ աստիճանավորում է նկատվում. այն կամ շատ բարձր է կամ շատ ցածր: Փորձագետը կարծում է, որ բոլոր հաստատությունները պետք է որոշակի մակարդակից բարձր լինեն:
Բաբուխանյանը հայտնեց նաև, որ այս պահին ֆեդերացիան աշխատում է ռեստորանները գնահատող միջազգային կազմակերպություններից մեկի հետ, որպեսզի հնարավոր լինի Հայաստանում ներդնել գնահատման համաշխարհային մակարդակ և ստանալ «աստղեր»: Նա չհրապարակեց կազմակերպության անվանումը, սակայն նշեց, որ դրա մասին շուտով կհայտարարվի: Նա նաև նշեց, որ այս և հաջորդ տարի ֆեդերացիան կկազմակերպի տարբեր առաջնություններ, և կոչ արեց միանալ բոլոր խոհարարներին, ռեստորաններին, սոմելիեներին, գինեգործներին ու կոնյակագործներին:-0-
