Աշնան ամենահամեղ, թարմ ու վիտամիններով հարուստ բանջարեղեններից մեկը դդումն է: Ոչ բոլորն են սիրում դդում, թեև այն օգտակարության առումով զբաղեցնում է առաջատար դիրքերից մեկը։ Մարդկանց մի մասին վանում է այս բանջարեղենի հոտը, սակայն մուրաբայի մեջ կա հաճելի բույր, որը կգրավի անգամ ամենաքմահաճ մարդուն։ Դեռ հին ժամանակներից մարդիկ նախընտրում էին դդմի մուրաբա պատրաստել ոչ միայն նրա համի, այլ նաև օգտակար հատկությունների համար։
Food&Wine-ը ներկայացնում է դդումով մուրաբայի պատրաստման 3 տարբերակ։
Դդմի մուրաբա կիտրոնով և նարնջով
Ոչ բոլորը գիտեն, որ նարնջով դդմի մուրաբան հիանալի այլընտրանք է ցանկացած հյուրասիրության համար:
Կիտրոնով և նարնջով դդմի մուրաբան հիանալի պահածո է ցուրտ ձմռան համար:
Անհրաժեշտ բաղադրիչներ
- մաքրած դդում-1 կիլոգրամ
- նարինջ-1 հատ
- կիտրոն-1 հատ
- շաքարավազ-1 կիլոգրամ
Պատրաստման եղանակը
Կեղևազրկած դդումը կտրել խորանարդերի կամ մանր շերտերի: Կիտրոնի և նարնջի կեղևն անցկացնել մանր քերիչով: Պետք է ուշադիր լինել, որ սպիտակ շերտը չանցկացվի հակառակ դեպքում մուրաբան փոքր–ինչ դառը կլինի:
Սպիտակ շերտը հեռացնել միջուկից և կիտրոնն ու նարինջը խորանարդիկների կտրատել։
Դդմի, կիտրոնի և նարնջի խորանարդիկները լցնել կաթսայի մեջ, ավելացնել շաքարավազը և թողնել 2 ժամ: Սպասել, որ հյութը դուրս գա և 10 րոպե եռացնել։ Այն պետք է թողնել մոտ կես օր։
Կես օր թողնելուց հետո ևս 30 րոպե եփել: Այնուհետև լցնել ստերիլ բանկաների մեջ և փակել: Ցանկության դեպքումվերջին անգամ եփելու ժամանակ կարելի է ավելացնել 0,5 թեյի գդալ վանիլին և աղացած կոճապղպեղ։
Խնձորով և դդումով մուրաբա
Այս մթերքներից պատրաստված համեղ մուրաբան բարելավվում է նյութափոխանակությանը, խթանում ուղեղի գործունեությունը, ամրապնդում իմունային համակարգը:
Անհրաժեշտ բաղադրիչներ
- դդում-1 կիլոգրամ
- շաքարավազ- 700-800 գրամ
- կիտրոն-2 հատ
- կեղևազրկված խնձոր-300-400 գրամ
Պատրաստման եղանակը
Առանձին կաթսաների մեջ մարմանդ կրակի վրա եփել մանրացրած դդումն ու խնձորը մինչև փափկի։ Ապա եփած դդումն ու խնձորը խառնել արդեն մեկ ընդհանուր կաթսայի մեջ, ավելացնել շաքարավազը, եռացնել ևս 15 րոպե։
Կիտրոնների հյութը քամել, լցնել կաթսայի մեջ և եփել մինչև թանձրանալը, ընթացքում անընդհատ խառնել, որպեսզի չայրվի։ Եփած հյութն ավելացնել խնձորի և դդմի վրա, ցնել ստերիլիզացված բանկաների մեջ և փակել:
Դդումով մուրաբա ծիրանաչրով
Այս մուրաբայի պատրաստման համար որոշ ժամանակ կպահանջվի, բայց, երբ ձմռան ցուրտ օրերին ծիրանաչրով ու դդումով մուրաբան մատուցեք տաք թեյի հետ, այն իսկական երանելի պահ կդառնա:
Անհրաժեշտ բաղադրիչներ
- դդում-1 կիլոգրամ
- ծիրանաչիր- 300 գրամ
- շաքարավազ-500 գրամ
- ջուր-1 լիտր
Պատրաստման եղանակը
Կեղևից և միջուկից մաքրված դդումն անցկացնել խոշոր քերիչով, ծիրանաչիրը լավ լվանալ և կտրատել բարակ շերտերի։
Դդումն ու ծիրանաչիրը խառնել շաքարավազի հետ, սպասել, որ հյութը դուրս գա և կրակի վրա դնել։ Եռացնել՝ ժամանակ առ ժամանակ խառնելով, հետո սառեցնել։ Այս գործողությունները կրկնել ևս 2-3 անգամ, մինչև դդումը փափկի: Լցնել ստերիլիզացված բանկաների մեջ և փակել:
