Forbes ամսագրի մեկնաբան Անն Աբելը իր հերթական հոդվածը նվիրել է Հայաստանին և կանխատեսել է, որ Հայաստանը ձեռք կբերի կարևոր երկրի հեղինակություն գաստրոճամփորդությունների համար։
Նա այցելել է Հայաստան մի խումբ զբոսաշրջիկների հետ աշխարհի լավագույն շեֆ խոհարարներից մեկը` միշլենյան աստղերի արժանացած Մեդս Ռեֆսլունդի կողմից Ծաղկունք գյուղում կազմակերպված գաստրոշոուի շրջանակում։
Աբելի կարծիքով, Հայաստանն արժանի է այնպիսի ուշադրության, ինչպիսին վայելում է հարևան Վրաստանը գաստրոտուրիզմի տեսանկյունից։ Խոհարարական տուրիզմը գրավում է ճանապարհորդներին, ովքեր ուղղում են իրենց խնայողությունները տեղական տնտեսության զարգացմանը։
Մեկնաբանը պատմել է Երևանում տիրող եվրոպական մթնոլորտի և գիշերային աշխույժ կյանքի մասին, հայերի այնպիսի որակների մասին, ինչպիսինն են բարությունն ու առատաձեռնությունը, ինտելեկտուալ մակարդակը, որը նկատվում է տեղացիների հետ զրույցների ժամանակ։
Աբելը նկատել է նաև հայերի սերը գրքերի նկատմամբ և անդրադարձել է Մատենադարանում պահվող հնագույն հրատարակությունների հարուստ հավաքածուին։
«Հիմա նոր սերունդը կրթությունը, գիտելիքների և տեխնոլոգիաների տարածումը փորձում է ներկայացնել որպես արտահանման պրոդուկտ։ Այսպես, Piscart հավելվածը ճանաչվել է «հայկական միաեղջյուր»։ Դիլիջանում գործող UWC քոլեջն ուսանողների է գրավում ամբողջ աշխարհից», – նշել է հոդվածի հեղինակը։
Նրա խոսքով, հայկական խոհանոցը շատ բազմազան է, բայց դրա առանձնահատկությունն է մեծ քանակի թարմ կանաչեղենի ու նռան օգտագործումը, այլ ոչ թե` համեմունքների։ Շատ տարածված են ոչխարի միսը, սմբուկը, յոգուրտը, պանրի տարբեր տեսակները, ինչպես նաև ավելուկը, Սևանա լճում հանդիպող իշխանը։ Հայկական հացը լավաշն է, այն հայկական մշակույթի անբաժանելի մասն է։ Լավաշը ներառված է ՅՈւՆԵՍԿՕ–ի ոչ նյութական մշակութային ժառանգության ցանկում։ Բացի այդ, Աբելը ներկայացրել է մեծ տպավորությունները, որոնք նա ստացել է հայկական վանքեր և լեռներ այցելելիս։–0–
