«Ֆուդ Ռեփաբլիք»-ի հիմնադիր տնօրեն Արսեն Հովհաննիսյանը և Հայաստանի պետական հետաքրքրությունների ֆոնդը (ԱՆԻՖ) հայտել են Hard Rock սրճարանի բացման նախագծի մեկնարկի մասին:
Ինչպես հայտնում է Food and wine հայկական պորտալը, օրերս «Ֆուդ Ռեփաբլիք»-ի հիմնադիր տնօրեն Արսեն Հովհաննիսյանը ֆրանչայզինգի պայմանագիր է ստորագրել Hard Rock International-ի հետ:
ԱՆԻֆ-ը ծրագրին մասնակցում է covid 19-ի տնտեսական հետևանքների մեղմացման նպատակով ստեղծված դուստր ընկերության հակաճգնաժամային ֆոնդի ծրագրերի շրջանակներում։
ԱՆԻՖ-ի և «Ֆուդ Ռեփաբլիք»-ի միջև պայմանագիրը կնքել են ԱՆԻՖ-ի «Ձեռնարկատեր + Պետություն հակաճգնաժամային ներդրումների կառավարիչ» ՓԲԸ տնօրեն Բելլա Մանուկյանը և «Ֆուդ Ռեփաբլիք» ընկերության տնօրեն Արսեն Հովհաննիսյանը։
ԱՆԻՖ-ը համաֆինանսավորում է ծրագիրը՝ 48% մասնակացության չափով։ Բիզնես աջակցության բոլոր ծրագրերում ԱՆԻՖ-ի հակաճգնաժամային ֆոնդի գործակցության նախապայմաններից է ձեռնարկատիրոջ առնվազն 50.1%-ի համաֆինանսավորման պատրաստակամությունը։
Նախագծի արժեքն ու ԱՆԻՖ-ի կողմից իրականացվող ներդրումներրի ծավալը չեն նշվում։
Hard Rock Cafe® Yerevan-ի բացումը նախատեսված է 2022թ․-ի երկրորդ եռամսյակում։
«Ֆուդ Ռեփաբլիք»-ի հիմնադիր տնօրեն Արսեն Հովհաննիսյանին են պատկանում հանրային սննդի ոլորտում տարիների հաջողված փորձ ունեցող Wine Republic, Thaiwine Republic, Asador, Mao և Point of View ռեստորանները, Hard Rock Cafe-ն, որի ցանցի հետ բանակցությունները սկսել էր դեռ 2019 թ.-ին։
«Համաշխարհային ճանաչում ունեցող նման ընկերության Ֆրանչայզի բացումը Երևանում ոչ միայն լավ նվեր կլինի հայ սպառողի և մայրաքաղաքի հյուրերի համար, այլև նոր խթան կհանդիսանա սպասարկման ոլորտի զարգացման գործում՝ նոր չափանիշներ սահմանելով երաժշտական ժամանցի, բիզնեսի և սպասարկման որակի կառավարման ոլորտներում։ Ռոքի ավանդույթներն իրենց տունը կվերագտնեն Հայաստանում։ Ուրախ կլինենք Երևանը դարձնել նոր գրավիչ կետ Hard Rock Cafe-ի բոլոր սիրահարների համար»,-ասել է «Ֆուդ Ռեփաբլիք»-ի հիմնադիր տնօրեն Արսեն Հովհաննիսյանը։
ԱՆԻՖ-ի տնօրեն Դավիթ Փափազյանն էլ իր գոհունակություն է հայտնել նման հանրաճանաչ բրենդի՝ Հայաստան մուտք գործելու առիթով:
«Վստահ ենք, որ պետական աջակցությունն առավել արդյունավետ է, երբ բիզնեսն ինքն ունի ընդլայնման, նոր նախաձեռնության տեսլական և պատրաստակամություն։ Մեր գործընկերների փորձն ու աշխարհահռչակ բրենդի ներկայությունը մայրաքաղաքում ոչ միայն հաջող բիզնես ծրագիր կդառնա, այլև կնպաստի Երևանի տուրիստական գրավչությանը», - ասաց Փափազյանը։ Առաջին Hard Rock Cafe-ն բացվել է Լոնդոնի կենտրոնում 1971 թ.-ին: Այսօր ցանցը գործում է ավելի քան 68 երկրներում, շուտով նաև՝ Հայաստանում։
