Food&Wine-ը այս շաբաթ կրկին ներկայացնում է բանջարեղենի կամ մրգի տեսակներ` անդրադառնալով դրանց կալորիականությանը, օգտակար և վնասակար հատկություններին, հակացուցումներին։ Այս անգամ կպատմենք հյութալի, առողջարար և վիտամիններով հարուստ նուռի մասին:
Նուռի մասին
Նուռը ջերմասեր միրգ է, այդ պատճառով այն ամենաշատն աճում է Մերձավոր Արևելքում, Կովկասում, Աֆրիկայում և Ասիայում: Հասունացման հիմնական ժամանակաշրջանը սեպտեմբերից նոյեմբերն է:
Հին Հռոմում նուռն ուներ երկու անվանում՝ «փյունիկյան խնձոր» և «հատիկավոր խնձոր»։ Հին Պարսկաստանում նուռը համարվում էր պտղաբերության և հավերժական կյանքի խորհրդանիշ: Այն պարունակում է ռեկորդային քանակի օգտակար նյութեր։ Վիտամին C-ի, B խմբի, կալիումի, մագնեզիումի, կալցիումի և այլ ակտիվ բաղադրիչների բարձր պարունակության շնորհիվ նուռը բարձրացնում է օրգանիզմի դիմադրողականությունը COVID-19-ի դեմ։
Կալորիականություն
- 100 գրամ նուռում - 72 կկալ
- Ածխաջրեր – 15 գրամ
- Սպիտակուցներ – 0.6 գրամ
- Ճարպեր-0.7 գրամ
Օգտակար հատկություններ
Այս հյութեղ միրգն օգնում է պայքարել արթրիտի դեմ: Արթրիտը հոդերի բորբոքումն է։ Նռան մեջ պարունակվող բուսական միացությունները հակաբորբոքային ազդեցություն ունեն, որոնք կարող են օգնել թեթևացնել հոդերի բորբոքման ինտենսիվությունը:
Երիկամների, լեղապարկի խնդիրներ ունեցող մարդկանց խորհուրդ է տրվում օգտագործել նռան քաղցր տեսակները կամ թարմ քամած նռան հյութ, շաքարախտի դեպքում, ընդհակառակը, բժիշկները խորհուրդ են տալիս ուտել նռան թթու տեսակները։
Նռան հյութը պարունակում է մեծ քանակությամբ հակաօքսիդանտներ, նույնիսկ ավելի շատ, քան կանաչ թեյը կամ ցանկացած այլ հյութ։ Նռան հյութը հիանալի հագեցնում է ծարավը, իջեցնում ջերմությունը։ Թարմ քամած նռան հյութն օգնում է պայքարել շնչառական հիվանդությունների, անգինայի դեմ։
Վնասակար հատկություններ
Պետք է հաշվի առնել, որ նռան հյութում պարունակվող թթուները կարող են քայքայել ատամի էմալը։ Սննդաբանները խորհուրդ են տալիս հյութը խմել ձողիկով, որից հետո անմիջապես ողողել բերանը։ Նռան հյութը կարող է վատ համադրվել որոշ դեղամիջոցների հետ, այնպես որ, եթե որևէ դեղամիջոց եք ընդունում, որոշ ժամանակով հրաժարվեք նուռից։
Ցածր ճնշում ունեցող մարդկանց խորհուրդ չի տրվում մեծ քանակությամբ նուռ օգտագործել, քանի որ այն իջեցնում է ճնշումը։ Նռան կեղևը պարունակում է թունավոր նյութեր՝ ալկալոիդներ, ուստի խորհուրդ չի տրվում ուտել կեղևը կամ դրանից թուրմեր պատրաստել։
Հակացուցումներ
Նուռը պարունակում է կիտրոնաթթու, խնձորաթթու, ուստի այն հակացուցված է մարսողական խնդիրներ ունեցողներին։ Աղիքային խոցով տառապող մարդկանց համար նուռը կամ հյութը կարող են վնասակար լինել, քանի որ գրգռում են ստամոքսի լորձաթաղանթը, ինչը կարող է հանգեցնել հիվանդության սրացման։ Նռան հյութն իջեցնում է արյան ճնշումը, ուստի հիպոթենզիվ հիվանդները պետք է խուսափեն նռան հյութից։ Թթվայնության բարձր մակարդակի պատճառով նռան հյութը հակացուցված է նաև գաստրիտով և ստամոքսի խոցով տառապողներին։ Ընդհանրապես, նռան հյութը միշտ պետք է խմել նոսրացված վիճակում, հակառակ դեպքում այն կարող է գրգռել ստամոքսի լորձաթաղանթը:
