ԵՐԵՎԱՆ, 26 հուլիսի. /Նովոստի-Արմենիա/. Ով կմտածեր, որ «Մատանիների տիրակալը» և «Հոբբիթ» հայտնի ֆիլմերից Հոբբիթների գյուղն այսուհետ հնարավոր կլինի գտնել ոչ միայն Նոր Զելանդիայում, այլև Հայաստանում:
Դիլիջանի ստվերաշատ անտառներում հայտնվել է հարմարավետ մի հյուրանոց, որտեղ կարելի է ապրել իսկական Հոբբիթների տնակներում: Ինչպես ֆիլմում, հայկական գյուղում ամեն ինչ նույնպես պատրաստված է բոլոր կանոններին համապատասխան` կլորիկ պատուհաններ և դռներ, քարե արահետներ, գողտրիկ այգիներ:
ՀՀ կառավարությունը Facebook-ի իր էջում հայտնում է, որ «Հոբբիթ» ֆիլմի սիրահարներն այժմ կարող են իրենց հանգիստը անցկացնել Հոբբիթի տնակներում։
Գուլանյանների ընտանիքը Դիլիջանում յուրահատուկ հյուրատուն է բացել՝ նպատակ ունենալով այն դարձնել նոր տուրիստական ուղղություն։ «Հաջորդ տարի մտադիր ենք ընդլայնել գործունեությունը` ներգրավելով նոր ներդրողների»,- ասում է Էդգար Գուլանյանը–0–
