ԵՐԵՎԱՆ, 27 օգոստոսի. /Նովոստի–Արմենիա/. Yerevan Food Fest ամենամյա գաստրոփառատոնի հիմնադիր Աննա Մազմանյանը Facebook–ի իր էջի ուղիղ եթերում պատմել է այս տարվա միջոցառման մասին։ Փառատոնի բացումը կկայանա նոր տեղում և նոր ձևաչափով սեպտեմբերի 18–ին, իսկ սեպտեմբերի 19-22–ը կանցկացվի դասախոսությունների, վարպետության դասերի, ընթրիքների շարք և ոչ միայն։
Փառատոնը բաղկացած կլինի չորս մասերից։
Առաջին հատվածը – Հայաստանում գաստրոտուրիզմի թեմայով համաժողովն է։ Այս տարի հատուկ ուշադրություն կհատկացվի մթերքներին, ֆերմերներին և նրան, թե ինչպես հետաքրքրել զբոսաշրջիկներին որոշակի մթերքով։ Մազմանյանը նշեց, որ բոլոր գլխավոր հյուրերը ներկա կլինեն համաժողովին, որտեղ կներկայացնեն իրենց հարուստ փորձը։ Բոլոր ցանկացողները կարող են նախապես գրանցվել և այցելել համաժողովը։
«BarShow» խորագրով երկրորդ մասը կանցկացվի առաջին անգամ։ Դրա շրջանակում Հայաստան կայցելեն երեք փորձագետներ, իսկ ղեկավարը կլինի լրագրող, բլոգեր և Craft Cocktails Berlin փառատոնի հիմնադիր ու կազմակերպիչ Ռոբերտ Շրետերը։ «Բարի» հատվածն իր հերթին կկիսվի սրճային և ալկոհոլային մասերի։
IFEP երրորդ մասն ամենամեծն է, որի շրջանակում հինգ երկրների խոհարարներ կսովորեցնեն համեղ և ճիշտ սնվել, ինչպես նաև սեփական խոհանոցնն անթափոն դարձնել։
Չորրորդ հատվածը բաղկացած կլինի դասախոսություններից։ Այս հատվածում բոլոր ցանկացողները կարող են շատ բան իմանալ ոլորտի մասին, սկսած ռեստորանի PR–ով զբաղվելու ձևերից մինչև ռեստորանների մասին տեսություններ գրելու տեխնիկա։ Դասախոսների թվում կլինի Իտալիայի ռեստորանային լավագույն տեսաբաններից մեկը` Ֆեդերիկո Ֆեռերոն։
Փառատոնի խոսնակներ կլինեն Դանիայից, Լիբանանից, Իսպանիայից, Ռուսաստանից, Իտալիայից և այլ երկրներից ժամանած հյուրեր։ Չի կարելի չնշել նաև «չորս ձեռքի երեք ընթրիքը»։ Առաջինը կանցկացվի Մերձավոր Արևելքից ժամանած Ջո Բարզոյի ղեկավարությամբ։ Երկրորդում շեֆ Ռաշիդ Ռախմանովն առաջին անգամ Հայաստանում կներկայացնի պերուանական խոհանոցի ընթրիք։
«Եվ այսպես, սեպտեմբերի 18-22–ը Երևանում կանցկացվի գլխավոր գաստրոնոմիկ տոնը, և կկազմակերպվի Yerevan Foоd Fest մինի ուսումնական կենտրոն»,– ասաց Մազմանյանը։
Նոր մանրամասները հայտնի կդառնան սեպտեմբերի 5–ին։ -0-
