ԵՐԵՎԱՆ, 31 օգոստոսի./Նովոստի–Արմենիա/. Խոհարարական արվեստի և հյուրընկալության ակադեմիայում շաբաթ օրը տեղի է ունեցել ճանաչողական շրջայց ԶԼՄ ներկայացուցիչների համար, որի շրջանակում հյուրերը ծանոթացան սպասքավորման նրբություններին, պիցցա–ակրոբատիկայի էլեմենտներին ու փորձեցին աչքերը փակ գուշակել մթերքը։
Մաթեմատիկական ճշգրտություն
Քչերը գիտեն, որ սպասքավորումը շատ մեծ նշանակություն ունի։ Կանոնների թվով այս արվեստը չի զիջում մաթեմատիկային։ Ակադեմիայում սովորեցնում են ոչ միայն ճիշտ սպասքավորման, այլև սեղանի առջև վարքագծի կանոնները, ինչպես նաև սպասքից և անձեռոցիկներից ճիշտ օգտվելու ձևը։ Ավելին, առաջարկվող սպասքից կարելի է անգամ կռահել, թե ինչ ճաշատեսակներ և ինչ հերթականությամբ են մատուցվելու։
Հարկ է նշել, որ ճիշտ սպասքավորում կատարելիս պրոֆեսիոնալներն օգտագործում են սանտիմետր և խոշորացույց, իսկ սեղանի ծայրից մինչև ափսեներ կամ սպասքի մինչև հեռավորությունը չափվում է սանտիմետրերով։
Համը` «փակ աչքերով»
Ընդունված կարծիք կա, որ սննդի գրավիչ տեսքը 57 տոկոսով բարձրացնում է ախորժակը: Իսկ դուք երբևէ փորձե՞լ եք սնվել դեպրիվացիայի պայմաններում, այսինքն, զրկված լինելով տեսնելու և լսելու, ինչպես նաև բույրերը զգալու հնարավորությունից: Այսպիսի գիտափորձ են որոշել անցկացնել Ակադեմիայի խոհարարները: Արդյունքում, փորձի մասնակիցները չեն կարողացել ըստ համի գուշակել ամենասովորական դդմիկն ու կիվին:
Պիցցա աճպարարություն և sous vide տեխնոլոգիա
Հայաստանում լավագույն պիցցա աճպարարներից մեկը` Սարգիս Առաքելյանը, հիրավի ձեռնածուի ճարպկությամբ ցուցադրեց, թե ինչպես է պիցցայի խմորը ճախրում օդում` ընդունելով զանազան ձևեր:
Իսկ խոհարարական ծրագրերի ղեկավար Կարեն Խաչատրյանը ցույց տվեց Հայաստանի համար նորույթ հանդիսացող sous vide տեխնոլոգիան` սոուսով մսի պատրաստման վարպետության դասի միջոցով:
Իսկ խոհարարական ծրագրերի ղեկավար Կարեն Խաչատրյանը ցույց տվեց Հայաստանի համար նորույթ հանդիսացող sous vide տեխնոլոգիան` սոուսով մսի պատրաստման վարպետության դասի միջոցով:
«Երեմյան Փրոջեքթս» խոհարարական ակադեմիայում, որի բացումը կայացավ 2019 թվականի ապրիլին, սովորում և վերապատրաստում են անցնում նոր սերնդի խոհարարներ և մատուցողներ, ինչպես նաև ոլորտի այլ մասնագետներ: Այստեղ կարելի է նաև անցնել հենքային ծրագիր կամ ստանալ, այսպես կոչված, «խոհարարական անգրագիտության վերացման» դասընթաց: -0-
