ԵՐԵՎԱՆ, 23 փետրվարի./Նովոստի-Արմենիա/. Այս տարի փետրվարի 24-ից մինչև մարտի 1-ը մենք տոնելու ենք Բարեկենդանը, որի ավանդական ուտեստը նրբաբլիթներն են: Դասական տոնական ուտեստներին բազմազանություն հաղորդելու համար առաջարկում ենք նրբաբլիթների բաղադրամտոմսերի ընտրանի «Аргументы и факты» կայքից:
Նրբաբլիթներից պատրաստված տորթ՝ կաթնաշոռով, սև սալորաչրով և ընկույզով
Բաղադրիչներ
Խմորի համար
- 250գ ալյուր
- 600 մլ կաթ
- 2 ձու
- 1 ճաշի գդալ շաքարավազ
- Բուսական յուղ (տապակը յուղապատելու համար)
- Աղ՝ ըստ ճաշակի
Միջուկի համար
- 300 գ յուղալի կաթնաշոռ
- 100 գ ընկույզ (մաքրված վիճակում)
- 100 գ սև սալորաչիր (կորիզահան վիճակում)
- 100գ յուղալի թթվասեր
- 2 ճաշի գդալ մեղր
- 200գ բալի ջեմ կամ կոնֆիտյուր
- 1 տուփ մրգային ժելե
- Հատապտուղներ՝ զարդարելու համար
Խմոր հունցելու համար ձուն, աղը, շաքարավազը լավ խառնել, ավելացնել սառը կաթի կեսը, հետո լցնել ալյուրը և խառնել հարիչով մինչև միասեռ զանգված ստացվի՝ պարբերաբար ավելացնելով մնացած կաթը: Ստացված հեղուկ խմորն անցկացնել մաղի միջով: Նրբաբլիթները պատրաստել լավ տաքացված և յուղով պատված տապակի վրա:
Պատրաստում ենք միջուկը. սև սալորաչիրն ու ընկույզը բլենդերով մանրացնել: Կաթնաշոռը, թթվասերը, սև սալորաչիրը, ընկույզը և մեղրը լավ խառնել:
Մեծ ամանի վրա (տրամաչափով նրբաբլիթներից մեծ) սննդային թաղանթ դնել: Նրբաբլիթները շարել ամանի ծայրերով՝ մինչև շրջանը լրանա, այնպես, որ նրբաբլիթների մոտ 1/3-ը մնա ամանից դուրս: Ամանի մեջտեղում նույնպես նրբաբլիթ դնել: Հետո հավասարաչափ տարածել կաթնաշոռային զանգվածը, կրկին նրբաբլիթ դնել, վրան տարածել բալի կոնֆիտյուրը կամ ջեմը: Նույն ձևով շարունակել դնել շերտերը՝ երկու խճողակները հերթականությամբ օգտագործելով: Տորթն ավարտել կոնֆիտյուրի կամ ջեմի շերտով: Տորթը պատել ամանից դուրս մնացած նրբաբլիթների ծայրերով, այնուհետև բլիթները ծածկել թաղանթի ծայրերով: 2-3 ժամ պահել սառնարանում (ոչ սառցախցիկում):
Մատուցելուց առաջ հանել ամանից, շուռ տալ և դնել մատուցվող ափսեի մեջ: Վրան շաղ տալ հատապտուղներ և ընկույզ:
Ավոկադոյով նրբաբլիթներ մեքսիկական ձևով
Բաղադրիչներ
Խմորի համար
- 1/3 բաժակ եգիպտացորենի կամ վարսակի ալյուր
- 1/2 բաժակ ցորենի ալյուր
- 1 թեյի գդալ շաքարավազ
- 1 բաժակ ոչ յուղոտ սերուցք (8% յուղայնությամբ),
- 2 ձու
- 2 ճաշի գդալ հալեցրած կարագ
- 1/4 թեյի գդալ խմորի փխրեցուցիչ
- Աղ՝ ըստ ճաշակի
Միջուկի համար
- 1 հատ մեծ, հասած ավոկադո
- 8-10 ծիլ կանաչ սոխ
- 2 լոլիկ
- 1 թեյի գդալ կետչուպ
- 2 թեյի գդալ կիտրոնի հյութ
- Աղ և պղպես՝ ըստ ճաշակի
Խմորի պատրաստման համար բոլոր բաղադրիչները հարել հարիչով մինչև ստացվի միասեռ զանգված։ Խմորը ծածկել և թողնել 20 րոպե։
Ավոկադոն կեղևազրկել և հանել կորիզը, մանր կտրատել։ Մաքրել լոլիկի կեղևը, կտրատել և հանել սերմերը։ Կտրատած ավոկադոն և լոլիկը խառնել կետչուպի և կիտրոնի հյութի հետ, ավելացնել աղ և պղպեղ։ Հարել 2-3 րոպե։ Ավելացնել կտրատած կանաչ սոխը և թողնել 20 րոպե։ Տաքացնել նրբաբլիթ թխելու սարքը, յուրաքանչյուր փոսի մեջ 2-3 ճաշի գդալ խմոր դնել, մակերեսը հարթեցնել։ Ամեն կողմից 1-2 րոպե թխել։ Պատրաստի բլիթի մի կեսին քսել միջուկը և ծածկել մյուս կեսով։
Բանանով և յոգուրտով նրբաբլիթ
Բաղադրիչներ
Բլիթների համար
- 1,5-2 բաժակ կաթ
- 3/4 բաժակ ալյուր
- 1 ձու
- 1 ձվի սպիտակուց
- 2 ճաշի գդալ մեղր
- 230 գ բանանի կամ վանիլի համով յոգուրտ
- 1 բանան
- 0,5 թեյի գդալ վանիլին
- 1 ճյուղ անանուխ
- Շաքարի փոշի
Պատրաստում ենք նրբաբլիթները. կաթը, ալյուրը, ձուն և ձվի սպիտակուցը միասին հարել, ավելացնել 1 ճաշի գդալ մեղր և հարել 5 րոպե։ Թավան տաքացնել, յուղ քսել։ Թխել նրբաբլիթները՝ խմորը լցնելով փոքր չափաբաժիններով։ Յուրաքանչյուր բլիթի վրա կարագ քսել, որպեսզի դրանք իրար չկպչեն։
Յոգուրտը, վանիլինը և մնացած մեղրը խառնել բլենդերի մեջ։ Բանանը մանր կտրատել, դնել բլիթների վրա և վրան լցնել յոգուրտով սոուսը։ Նրբաբլիթները փաթաթել և մատուցել ափսեի մեջ՝ զարդարելով անանուխով և շաքարի փոշիով։-0-
