ԵՐԵՎԱՆ, 20 մարտի./Նովոստի–Արմենիա/. Yerevan Wine Days միջոցառումը տեղափոխվել է, այն կանցկացվի այս տարի սեպտեմբերի 4–5–ը, հաղորդում է կազմակերպիչ «ԷվենտՏուրա» ընկերությունը։
Միջոցառման անցկացման վայրն անփոփոխ է`Սարյան, Մոսկովյան և Թումանյան փողոցներ։
Կազմակերպիչները նշում են, որ որոշումն ընդունվել է` առաջին հերթին արժևորելով և կարևորելով մարդու կյանքն, առողջությունն ու անվտանգությունը, ելնելով մեր երկրում և ամբողջ աշխարհում տիրող իրավիճակից, նաև ընկերության սոցիալական բարձր պատասխանատվությունից։
«Մենք լավատեսորեն ենք մոտենում և հավատացած ենք, որ «Երևանի Գինու Օրեր»-ը լինելու են համամարդկային վտանգը հաղթահարելու և հաղթելու առիթով տոնելու օրեր: Ինչպես հայերս, այնպես էլ մի շարք երկրներից զբոսաշրջիկներ կհավաքվենք, կտոնենք և կխմենք բոլորիս հաղթանակի կենացը», – նշել են ընկերությունից։ Yerevan Wine Days–ն այս տարի պետք է անցկացվեին մայիսի 1–2–ը։ Ամեն տարի հատուկ այս փառատոնի համար Հայաստան են այցելում բազմաթիվ զբոսաշրջիկներ։ Միջոցառմանը մասնակցում է 25 գինեգործարան, և ինչպե սնշում են կազմակերպիչները, մասնակիցները թիվը սահմանափակ է, քանի որ պարզապես տեղ չի լինում։–0–
