ԵՐԵՎԱՆ, 3 ապրիլի./Նովոստի-Արմենիա/. Ինքնամեկուսացման մեջ մնալով` կարելի է ձեռք բերել խոհարարական նոր հմտություններ ու պատրաստել ռեստորանային ամենահայտնի ճաշատեսակներից մեկը:
«Խոհարարական դասընթացներ՝ առանց տնից դուրս գալու» նյութերի շարքի շրջանակում առաջարկում ենք ձեզ հայտնի Կարբոնարա պաստայի պարզ բաղադրատոմս:
Բաղադրիչներ
- Սպագետի – 500 գ.
- Հում ապխտած խոզապուխտ կամ հավի փափկամիս – 300 գ.
- Սխտոր - 1 պճեղ
- Պինդ պանիր – 100 գ.
- Դեղնուցներ – 6 հատ
- Ձիթապտղի յուղ – 6 ճաշի գդալ
- Աղ
- Աղացած սև պղպեղ
Պատրաստման եղանակը
Եռացող ջրի մեջ ավելացնել աղ, սև պղպեղ և ձիթապտղի յուղ, աստիճանաբար կաթսայի մեջ դնել սպագետին՝ դրանց փափկելուն զուգընթաց: Եփել մինչև «ալ դենտե» վիճակը (8-10 րոպե):
Խոզապուխտը կամ հավի փափկամիսը կտրատել բարակ կտորներով կամ խորանարդիկներով, մանր կտրատել սխտորը: Տապակի մեջ տաքացնել ձիթապտղի յուղը, ավելացնել խոզապուխտն ու սխտորը և տապակել 2-3 րոպե մինչև կարմրելը:
Առանձին թասիկի մեջ մանր քերիչով անցկացնել պանիրը, ավելացնել սպագետիի տաք ջրից 8-10 ճաշի գդալ և խառնել: Հարել դեղնուցները և ավելացնել պանրային զանգվածին: Սոուսը պատրաստ է:
Պատրաստի սպագետին թողնել, որ քամվի, տեղափոխել նախապես տաքացված թասիկի մեջ՝ ավելացնելով սոուսը և խառնել: Ավելացնել սխտորի հետ տապակած խոզապուտը կամ հավի փափկամիսը, աղն ու սև պղպեղը և մատուցել:
Բարի ախորժակ:
