ԵՐԵՎԱՆ, 3 մայիսի./Նովոստի–Արմենիա/. Yerevan Wine Days–ը տարվա ամենասպասված իրադարձություններից է, որն իր շուրջն է համախմբում գինու սիրահարների ամբողջ աշխարհից։ Սովորաբար մայիսյան Սարյան փողոցը լցվում է գինու բույրով, հարմարավետության գերող մթնոլորտով։ Սակայն աշխարհը պատած կորոնավիրուսի համավարակն ամեն ինչ փոխեց։ Եվ Yerevan Wine Days–ը տեղափոխվեց առցանց հարթակ։
Տեղափոխելով սեպտեմբերի 4–5–ը նախատեսված միջոցառումը` կազմակերպիչները որոշեցին պահպանել մայիսյան Yerevan Wine Days–ի ավանդույթն ու անցկացնել այն ուղիղ եթերում։ Միջոցառումը հեռարձակվում է մայիսի 3–ին ժամը 15։00–ից մինչև 20։15–ը։
Yerevan Wine Days–ի կազմակերպիչներն անցկացնում են լավագույն կենացի մրցույթ` թեմային մրցանակներով, ներկայացնում են դասախոսություններ սոմելիեների և գինեգործների կողմից։
Միջոցառման վարող Հերմինե Ստեփանյանն ու DJ Guevo միացան եթերին Սարյան փողոցում գտնվող կոլորիտային պատշգամբից, գինեգործները, սոմելիեները, ընկերությունների ներկայացուցիչները միանում են բաց հարթակներից և անգամ իրենց սեփական տներից։
Բացի միջոցառմանը հետևելուց, հանդիսատեսը կարող է առցանց պատվիրել գինի փառատոնին մասնակցող ընկերությունների կողմից առաջարկվող հատուկ զեղչերով։ Ի դեպ նշենք, որ փառատոնին մասնակցում են տասնյակից ավելի ընկերություններ։
Ողջ օրվա ընթացքում եթերին միանում են Հայաստանում և Արցախում գործող գինու արտադրամասերի ղեկավարներ, ներկայացուցիչներ, աշխատակիցներ, որոնք պատմում են իրենց գինիների մասին։
Առցանց Yerevan Wine Days –ի նպատակն է յուրաքանչյուրին անհատական տրամադրությունը համախմբել և համընդհանուր տոն պարգևել «մեկուսացվածներիս»։ Հանդիսատեսը հնարավորություն ունի վայելել հաղորդավարի ու DJ-ի կողմից ստեղծված բարձր ու տոնական տրամադրությունը, պարել գինու բաժակը ձեռքը, գինեգործների կողմից ծանոթանալ իրենց գինիների ստեղծման պատմությանն, անվանման ծագմանը, այդ գինու և սննդի համադրման խորհուրդներին և որ ամենակարևորն է հարցեր տալ ու ստանալ պատասխաններ։ Հայաստանում տարեց տարի զարգանում է գինեգործությունը, ողջ աշխարհում մեծ տարածում է գտնում հայկական գինի, և ստեղծված ծանր իրավիճակում նման գրագետ մոտեցումը կարող է ավելի մեծ հնարավորություններ բացել այս գործընթացի հետագա առաջխաղացման համար։–0–
